Almatydaǵy Qazaqtelekom qyzmetkerleri ótken jyldyń jeltoqsan aıynan beri jalaqy máselesin kóterip, beıbit mıtıngke shyǵyp, talaptaryn aıtyp keledi. Basshylyqtyń beıbereket áreketinen sharshadyq degen qyzmetkerler «erekshe qamqoryndaǵy» dindar áriptesteri týraly aıtyp, ókpesin jetkizdi. Bul týraly Azattyq Rýhy saıtyna silteme jasap, "Adyrna" ulttyq portaly habarlaıdy.
Aty-jónin ashyq jarııalamaýdy suraǵan qyzmetkerler basshylyqqa Tımýr Hýdaıberdıev kelýinen keıin, namazhandarǵa degen erekshe qamqorlyq bastaldy deıdi.
«Tımýr Telmanulynyń bizge basshylyqqa kelýimen namazhandarǵa degen erekshe qoldaý bastaldy. Qazir ol «Qazaqtelekom» AQ tóraǵasy Qýanyshbek Esekeevtiń orynbasary. Buryn ol kisi satyp alý dırekııasynda bas dırektor bolǵan, atalǵan fılıaldaǵylar Tımýrdyń kelýinen keıin namaz ýaqytynda dálizde qaz-qatar jaınamaz jaıyp, qulshylyǵyn oryndaıtyn bolyp ketti. Bireýler «qulshylyq jasaı bersin, onda turǵan ne bar?» deıtin bolar. Biraq olardyń barlyǵynyń derlik balaǵy qysqa, saqaly uzyn. Sosyn Almatynyń ár fılıalyndaǵy dindarlardyń jalaqysyn kóterip, janyna jınaı bastady. Máselen, bes jyl jumys tájirıbem bar men jáne eki jyl jumys ótili bar namazhan tursaq, laýazymdy qyzmetke birinshi sony qoıady. Sebebi, ol sol jamaǵattan. Sol dırekııada keminde 50 namazhan jumys isteıdi», - dedi ol.
Eldegi rýshyldyq pen jershildikten sharshaǵan mamandar endi bul tizimge kimniń namaz oqyp oqymaıtyny qosyldy dep otyr.
«Qarapaıym ınjener bolyp júrgen namazhan jigitti Tımýr myrza birden bas menedjer etip taǵaıyndady. Negizi ol orynǵa birneshe jyldyq tájirıbesi bar maman saılanǵaly turǵan edi, Telmanuly bir telefon qońyraýymen dinshil jigitti saılap jiberdi. Kez kelgen mekemede kásibı sheberlik, jumys ótili birinshi kezekte bolýy kerek emes pe?! Namaz, qulshylyq ol adamnyń jeke sharýasy. Basshylardyń rýshyldyq, jershildigi azdaı, endi kim namaz oqıdy, kim oqymaıdy dep mamandardy bóler bolsaq, onda biz nesine bálenbaı jyl JOO-da oqý oqydyq», - deıdi ashynǵan qyzmetkerler.
Sońǵy kezde qyzmetkerleri jalaqyny kóterýdi talap etip jatqan Qazaqtelekom dırektorlarynyń qyzyǵy munymen bitpeıdi. Shaǵymdanýshylardyń sózinshe, keńsedegi jınalys kezinde basshy talap qoıǵandardy tildepti.
«Birinshi aqpan kúni Jeli dıvızony birlestikteriniń oblystardaǵy tehnıkalyq dırektorlarymen onlaın jınalysy ótti. Atalǵan jınalysta bas dırektor alkogol iship alǵandaı kórindi, sebebi etıkaǵa saı emes sózder aıtyp, ózin birtúrli dóreki ustady», - dedi Qazaqtelekom qyzmetkeri.
Sondaı-aq, qyzmetkerler «Qazaqtelekom» AQ fılıaly bas dırektory Bolat Erlanulyna «Almatytelekom» TBS ujymy jalaqy men basqa da problemalaryna qatysty jazbasha ótinish jazǵan. Basshylyq qyzmetkerlerdiń talap-tilekterine qatysty sharalardy kelesi apta aıtýǵa ýáde beripti.
«Biz «Qazaqtelekom» AQ fılıaly – «Almatytelekom» TBKB-niń tehnıkalyq blogy qyzmetkerleriniń ujymy laýazymdyq jalaqylardyń keminde eki ese ósýin talap etip otyrmyz. Sebebi, kásiporyndaǵy qyzmetkerlerdiń shtattyq sanynyń qysqarýyna baılanysty oryndaıtyn jumys kólemimiz ulǵaıdy. Mindetterimiz ben jaýapkershilik óskenimen, jalaqynyń ósetin túri bolmaı tur. Bizdegi qatardaǵy ınjenerlerdiń alatyn aılyǵy – 66 myń teńge. Oılańyzshy, ony qaıda jetkizýge bolady. Elde kún saıyn azyq-túlik, páter baǵasy qymbattap jatyr. Odan bólek, arnaıy mamandardyń jumysta kıetin qyzmettik kıimderi, aıaq kıimderi, tehnıkalyq quraldarynyń barlyǵy eski. Qyzmettik kólikterimiz eski, jańa kólikterdi tek basshylyq qyzmettegiler qoldanady. Ólsheý quraldary da jetkiliksiz. Almatydaǵy Panfılov kóshesi boıynda ornalasqan ǵımarattyń jartysyn jekemenshikke satyp jiberip, syımaı qalǵan qyzmetkerlerdi stanııaǵa jibere saldy. Bir sózben aıtqanda, biz sııaqty qatardaǵy qarapaıym qyzmetkerlerge jumys isteýge jaǵdaı múldem jasalmaǵan. Biz eldegi ózgeristermen birge jaǵdaıymyzdyń da ózgergenin qalaımyz. Basshylyq «9 aqpan kúni jınalys ashyp, bizge bir jaýabyn aıtamyz» dedi. Biraq bul máseleni bizdiń kóterip kele jatqanymyzǵa birneshe ýaqyt boldy, endi eldegi ózgeristermen birge bizdiń de jaǵdaıymyz ózgerip qalar degen úmittemiz», - dedi qyzmetkerler.
Eske salsaq, 31 qańtar kúni Almatyda «Qazaqtelekom» AQ qyzmetkerleri jalaqyny kóterýdi talap etip, narazylyqtaryn bildirdi. Tehnıkalyq bólimniń qyzmetkerleri bir kún jumysqa shyqpaı qoıǵan.
"Adyrna" ulttyq portaly
