ەنەرگەتيكا ءمينيسترى بولات اقشولاقوۆ مەجەلى 180 كۇن وتكەن سوڭ سۇيىتىلعان گاز باعاسى قالاي رەتتەلەتىنىن ءتۇسىندىردى، - دەپ حابارلايدى “ادىرنا” ۇلتتىق پورتالى Tengrinews.kz سايتىنا سىلتەمە جاساپ.
"مەجەلى 180 كۇننەن كەيىن گاز باعاسى قالاي بولادى؟ جوسپارلارىڭىز قانداي" - دەپ سۇرادى جۋرناليستەر.
ءجۋرناليستىڭ ساۋالىنا جاۋاپ بەرگەن مينيستر 180 كۇن ىشىندە ساۋدا ەرەجەلەرى مەن سۇيىتىلعان گازدىڭ باعا جۇيەسىن رەفورمالاۋ ازىرلەنەتىنىن اتاپ ءوتتى.
"ەل باسشىلىعىنىڭ تاپسىرماسى بويىنشا قاڭتاردىڭ باسىندا، شىنىمەن دە، سۇيىتىلعان گازدىڭ باعاسىن 180 كۇنگە مەملەكەت باقىلاۋىنا الۋ تۋرالى شەشىم قابىلدانعان بولاتىن. قازىر ونىڭ باعاسى 50 تەڭگەدەن 75 تەڭگە ارالىعىندا تۇر. ياعني، ەڭ شالعاي ەلدى مەكەندەردە باعانىڭ شەگى 75 تەڭگە بولسا، مۇناي وڭدەۋ زاۋىتى بار ماڭعىستاۋ وبلىسىندا 50 تەڭگە. بىراق، بەلگىلەنگەن 180 كۇننىڭ ىشىندە جانار-جاعارماي سياقتى سۇيىتىلعان گازدىڭ دا باعاسىن قالىپتاستىرۋ جۇيەسى مەن ساتۋ ەرەجەلەرىن رەفورمالاپ شىعۋىمىز كەرەك. ءبىزدىڭ ويىمىزشا، زەرتتەۋلەر كورسەتكەندەي، جانار-جاعارماي سياقتى سۇيىتىلعان گازدىڭ دا نارىق تىزبەگىندە ء"ونىمسىز دەلدالدار" بار", - دەپ ءتۇسىندىردى اقشولاقوۆ وكق ونلاين-بريفينگىندە.
ونىڭ ايتۋىنشا، سۇيىتىلعان گازدىڭ نارىق تىزبەگىندە مەنشىگىندە نە گاز قۇيۋ ستانساسى، نە گاز جيناقتاۋ ستانساسى جوق ويىنشىلار بار. سوعان قاراماستان گاز تاراتۋ جۇيەسىندە وتىر.
ء"بىز وسىنداي ويىنشىلاردى تىزبەكتەن الىپ تاستايتىن شىعارمىز. ياعني، تەك ناقتى گاز وندىرۋشىلەر، گاز قۇيۋ ستانسالارى نەمەسە ۇيلەرگە قاجەت گازدى جيناقتايتىن ستانسالارى بار ويىنشىلار عانا قالادى. بۇل بىزگە ءتىپتى وسى 50 تەڭگەلىك باعانىڭ ىشىندە نارىق تىزبەگىندەگى قاتىسۋشىلاردىڭ كىرىستىلىگىن قايتا رەتتەۋگە مۇمكىندىك بەرەدى. ياعني، گازدى ساتۋشىلار مەن وندىرۋشىلەردىڭ اراسىنداعى تابىس تەڭگەرىمى قايتا قارالادى. نەگىزى گاز وندىرۋشىلەردىڭ تابىسى كوبىرەك بولۋى كەرەك. ويتكەنى ءبىزدىڭ زاۋىتتارداعى سۇيىتىلعان گازدىڭ وزىندىك قۇنى تونناسىنا 100 مىڭ تەڭگەگە دەيىن جەتۋى مۇمكىن. بۇل ءبىر ليتر گازدى وندىرۋگە عانا شامامەن 50 تەڭگە كەتەدى دەگەن ءسوز. ازىرگە بۇل زاۋىتتار بەلگىلەنگەن 180 كۇندە شىعىنمەن جۇمىس ىستەيدى", - دەدى بولات اقشولاقوۆ.
ءمينيستردىڭ ايتۋىنشا، گاز وندىرۋمەن اينالىسىپ، جانارماي قۇيۋ بەكەتتەرى ارقىلى ساتاتىندار قالۋى مۇمكىن. ۆەدومستۆو باسشىسى بۇل گاز ساتۋشىلار مەن وندىرۋشىلەر اراسىندا تابىستى قايتا بولۋگە مۇمكىندىك بەرەتىنىن جانە ازىرگە بۇل زاۋىتتار 180 كۇن بويى شىعىنعا باتىپ جۇمىس ىستەيتىنىن اتاپ ءوتتى.
“ادىرنا” ۇلتتىق پورتالى
