Energetıka mınıstri Bolat Aqsholaqov mejeli 180 kún ótken soń suıytylǵan gaz baǵasy qalaı retteletinin túsindirdi, - dep habarlaıdy “Adyrna” ulttyq portaly Tengrinews.kz saıtyna silteme jasap.
"Mejeli 180 kúnnen keıin gaz baǵasy qalaı bolady? Josparlaryńyz qandaı" - dep surady jýrnalıster.
Jýrnalıstiń saýalyna jaýap bergen mınıstr 180 kún ishinde saýda erejeleri men suıytylǵan gazdyń baǵa júıesin reformalaý ázirlenetinin atap ótti.
"El basshylyǵynyń tapsyrmasy boıynsha qańtardyń basynda, shynymen de, suıytylǵan gazdyń baǵasyn 180 kúnge memleket baqylaýyna alý týraly sheshim qabyldanǵan bolatyn. Qazir onyń baǵasy 50 teńgeden 75 teńge aralyǵynda tur. Iaǵnı, eń shalǵaı eldi mekenderde baǵanyń shegi 75 teńge bolsa, munaı óńdeý zaýyty bar Mańǵystaý oblysynda 50 teńge. Biraq, belgilengen 180 kúnniń ishinde janar-jaǵarmaı sııaqty suıytylǵan gazdyń da baǵasyn qalyptastyrý júıesi men satý erejelerin reformalap shyǵýymyz kerek. Bizdiń oıymyzsha, zertteýler kórsetkendeı, janar-jaǵarmaı sııaqty suıytylǵan gazdyń da naryq tizbeginde "ónimsiz deldaldar" bar", - dep túsindirdi Aqsholaqov OKQ onlaın-brıfınginde.
Onyń aıtýynsha, suıytylǵan gazdyń naryq tizbeginde menshiginde ne gaz quıý stansasy, ne gaz jınaqtaý stansasy joq oıynshylar bar. Soǵan qaramastan gaz taratý júıesinde otyr.
"Biz osyndaı oıynshylardy tizbekten alyp tastaıtyn shyǵarmyz. Iaǵnı, tek naqty gaz óndirýshiler, gaz quıý stansalary nemese úılerge qajet gazdy jınaqtaıtyn stansalary bar oıynshylar ǵana qalady. Bul bizge tipti osy 50 teńgelik baǵanyń ishinde naryq tizbegindegi qatysýshylardyń kiristiligin qaıta retteýge múmkindik beredi. Iaǵnı, gazdy satýshylar men óndirýshilerdiń arasyndaǵy tabys teńgerimi qaıta qaralady. Negizi gaz óndirýshilerdiń tabysy kóbirek bolýy kerek. Óıtkeni bizdiń zaýyttardaǵy suıytylǵan gazdyń ózindik quny tonnasyna 100 myń teńgege deıin jetýi múmkin. Bul bir lıtr gazdy óndirýge ǵana shamamen 50 teńge ketedi degen sóz. Ázirge bul zaýyttar belgilengen 180 kúnde shyǵynmen jumys isteıdi", - dedi Bolat Aqsholaqov.
Mınıstrdiń aıtýynsha, gaz óndirýmen aınalysyp, janarmaı quıý beketteri arqyly satatyndar qalýy múmkin. Vedomstvo basshysy bul gaz satýshylar men óndirýshiler arasynda tabysty qaıta bólýge múmkindik beretinin jáne ázirge bul zaýyttar 180 kún boıy shyǵynǵa batyp jumys isteıtinin atap ótti.
“Adyrna” ulttyq portaly
