كوككوڭبەك قابىرعالار
...بىرەر ساعاتتان سوڭ،
ۆان گوگتىڭ «تۇتقىندار» كارتيناسىنداعىداي
قابىرعالارى كوككوڭبەك
كامەرانى اينالىپ جۇرە باستادىق،
دالىزدەن «توق...»، «توق...» ەتىپ كەلە جاتقان
اياق كيىم داۋسىنان قورقىپ.
كوككوڭبەك قابىرعالار –
كوك تۋدى ەسىمىزگە سالادى;
اقوردا تورىندە ءىلىنىپ تۇرعانىن ەمەس،
الاڭدا جەلبىرەگەنىن
ەسىمىزگە سالادى كوككوڭبەك قابىرعالار.
ءبىز بەينە سول تۋدى جامىلىپ
الاڭدا كوز جۇمعان
ادامنىڭ ءمايىتى باسىندا
اينالىپ جۇرگەن
ارۋاقتار سەكىلدىمىز –
دالىزدەن «توق...»، «توق...» ەتىپ،
اياق كيىم داۋسى جاقىنداپ كەلەدى.
قانشا اينالعانىمىز ەسىمىزدە جوق،
كوزدەرىمىزدى تومەنگە قاداپ،
شوككەن تاۋلاردىڭ شوقىلارىن باسىپ،
ايدى موينىمىزعا ءىلىپ،
تۋ جامىلعان ارۋاقتار سەكىلدى
اينالا بەرىپپىز،
اينالا بەرىپپىز،
اينالا بەرىپپىز –
ورتامىزدا مارقۇمنىڭ رۋحىنا ۇقساپ،
بەينە ءبىر ءبىز وتىرعان كامەرانىڭ تورىنداي
قامشىنىڭ ىزىنە قامالعان
كوكمويناقتىڭ تۇرعانىن دا ەلەمەي.
ءبىز ونى ءسال بۇرىن
كورشى كامەرادان اكەپ تاستاعان
تۇتقىن دەپ ويلادىق:
ونىڭ كىسىنەگەنى مەن
تۇتقىننىڭ شىڭعىرعان ءۇنىن اجىراتا الار ەمەسپىز.
كوكمويناق كىسىنەيدى،
تۇتقىن شىڭعىرادى،
كوكمويناق شىڭعىرادى،
تۇتقىن كىسىنەيدى.
دالىزدەن «توق...»، «توق...» ەتىپ،
اياق كيىم داۋسى جاقىنداپ كەلەدى.
كوككوڭبەك قابىرعالار
اياق كيىم داۋسى جاقىنداعان سايىن
كوك تۋ بولۋدان قالىپ،
ءيىرىمدى سۋعا اينالا باستايدى.
ءبىز بەينە كوك تۋدىڭ قۇشاعىندا
سۋعا باتىپ بارا جاتقاندايمىز.
كۇن دە اسپاندا ەمەس،
قىران دا اسپاندا ەمەس،
سۋعا باتىپ بارا جاتقانداي ءبارى.
كورشى كامەراداعى ازاپتان،
كوشەدەگى اتىلعان وقتان،
كوكمويناقتى قالايشا
امان اپ قالۋعا بولادى؟
قالايشا ءتىرى الىپ قالۋعا بولادى،
تۋ تۇستەس قابىردىڭ ىشىنەن؟
دالىزدەن «توق...»، «توق...» ەتىپ،
اياق كيىم داۋسى جاقىنداپ كەلەدى.
ءبىز سوندا سوڭعى ۇمىتىمىزبەن
سۋعا باتىپ بارا جاتقان كۇندى
كوكمويناقتىڭ تۇياعىنا سەپتىك،
قىراننىڭ قاناتىن بەردىك.
سامعا ەندى، كوكمويناق!
سەنىڭ التىن تۇياعىڭ بار،
الىپ قاناتىڭ بار،
سەن ەندى ەركىنسىڭ، كوكمويناق!
قالىقتا تومەنگە قاراماي!
سالدەن سوڭ،
تۋ تۇستەس قابىردى سۋ باسادى.
ءبىزدىڭ ولىگىمىز سۋدىڭ بەتىنە ءىسىپ شىعادى سالدەن سوڭ،
كوك تۋدىڭ بەتىنە قالقىپ شىعادى ءبىزدىڭ ولىگىمىز.
قانىمىز – كۇنگە،
سۇيەگىمىز – قىرانعا،
قامشىنىڭ ءىزى – ويۋعا اينالادى، كوكمويناق.
كۇنى ەرتەڭ قيالىمىزداعى جەرۇيىقتا
بولاشاق ءبىزدى تۋ عىپ جەلبىرەتەتىن بولادى، كوكمويناق.
بولاشاق سەنىمەن جۇيتكيتىن بولادى، كوكمويناق.
قالىقتا تومەنگە قاراماي!
قالىقتا!
دالىزدەن «توق...»، «توق...» ەتىپ،
اياق كيىم داۋسى جاقىنداپ كەلەدى…
«توق...».
«توق..».
«توق...».
فايزوللا ءتولتاي
facebok پاراقشاسىنان
