Kókkóńbek qabyrǵalar

3434
Adyrna.kz Telegram

Kókkóńbek qabyrǵalar

...Birer saǵattan soń,
Van Gogtyń «Tutqyndar» kartınasyndaǵydaı
qabyrǵalary kókkóńbek
kamerany aınalyp júre bastadyq,
Dálizden «Toq...», «Toq...» etip kele jatqan
Aıaq kıim daýsynan qorqyp.

Kókkóńbek qabyrǵalar –
kók týdy esimizge salady;
Aqorda tórinde ilinip turǵanyn emes,
alańda jelbiregenin
esimizge salady kókkóńbek qabyrǵalar.
Biz beıne sol týdy jamylyp
Alańda kóz jumǵan
adamnyń máıiti basynda
aınalyp júrgen
árýaqtar sekildimiz –
Dálizden «Toq...», «Toq...» etip,
Aıaq kıim daýsy jaqyndap keledi.

Qansha aınalǵanymyz esimizde joq,
Kózderimizdi tómenge qadap,
Shókken taýlardyń shoqylaryn basyp,
Aıdy moınymyzǵa ilip,
Tý jamylǵan árýaqtar sekildi
Aınala berippiz,
Aınala berippiz,
Aınala berippiz –
Ortamyzda marqumnyń rýhyna uqsap,
Beıne bir biz otyrǵan kameranyń toryndaı
Qamshynyń izine qamalǵan
Kókmoınaqtyń turǵanyn da elemeı.
Biz ony sál buryn
Kórshi kameradan ákep tastaǵan
tutqyn dep oıladyq:
Onyń kisinegeni men
tutqynnyń shyńǵyrǵan únin ajyrata alar emespiz.
Kókmoınaq kisineıdi,
Tutqyn shyńǵyrady,
Kókmoınaq shyńǵyrady,
Tutqyn kisineıdi.
Dálizden «Toq...», «Toq...» etip,
Aıaq kıim daýsy jaqyndap keledi.

Kókkóńbek qabyrǵalar
Aıaq kıim daýsy jaqyndaǵan saıyn
Kók tý bolýdan qalyp,
Iirimdi sýǵa aınala bastaıdy.
Biz beıne kók týdyń qushaǵynda
Sýǵa batyp bara jatqandaımyz.
Kún de aspanda emes,
Qyran da aspanda emes,
Sýǵa batyp bara jatqandaı bári.
Kórshi kameradaǵy azaptan,
Kóshedegi atylǵan oqtan,
Kókmoınaqty qalaısha
aman ap qalýǵa bolady?
Qalaısha tiri alyp qalýǵa bolady,
Tý tústes qabirdiń ishinen?
Dálizden «Toq...», «Toq...» etip,
Aıaq kıim daýsy jaqyndap keledi.

Biz sonda sońǵy úmitimizben
sýǵa batyp bara jatqan kúndi
Kókmoınaqtyń tuıaǵyna septik,
Qyrannyń qanatyn berdik.
Samǵa endi, Kókmoınaq!
Seniń altyn tuıaǵyń bar,
Alyp qanatyń bar,
Sen endi erkinsiń, Kókmoınaq!
Qalyqta tómenge qaramaı!
Sálden soń,
Tý tústes qabirdi sý basady.
Bizdiń óligimiz sýdyń betine isip shyǵady sálden soń,
Kók týdyń betine qalqyp shyǵady bizdiń óligimiz.
Qanymyz – kúnge,
Súıegimiz – qyranǵa,
Qamshynyń izi – oıýǵa aınalady, Kókmoınaq.
Kúni erteń qııalymyzdaǵy jeruıyqta
Bolashaq bizdi tý ǵyp jelbiretetin bolady, Kókmoınaq.
Bolashaq senimen júıtkıtin bolady, Kókmoınaq.
Qalyqta tómenge qaramaı!
Qalyqta!
Dálizden «Toq...», «Toq...» etip,
Aıaq kıim daýsy jaqyndap keledi…
«Toq...».
«Toq..».
«Toq...».

Faızolla Tóltaı

facebok paraqshasynan

Pikirler