قازاقستاندا ءاربىر ونىنشى بالا از قامتىلعان وتباسىندا تۇرىپ جاتىر. قازاقستان رەسپۋبليكاسى پارلامەنتى ءماجىلىسىنىڭ الەۋمەتتىك-مادەني دامۋ كوميتەتىنىڭ مۇشەسى، "قامقورلىق" قورىنىڭ جەتەكشىسى دينارا زاكيەۆا ااك-ءتى ءار بالاعا كۇنكورىس مينيمۋمىنا دەيىن ارتتىرۋدى ۇسىندى، دەپ حابارلايدى “ادىرنا” ۇلتتىق پورتالى ينفورمبيۋرو جاڭالىقتار قىزمەتىنە سىلتەمە جاساپ.
"كەمىندە 625 مىڭ، دەمەك ءاربىر ونىنشى بالا، از قامتىلعان وتباسىندا تۇرىپ جاتىر. مۇنداي وتباسىنى قولداۋدىڭ ءبىر ءتۇرى – اتاۋلى الەۋمەتتىك كومەك، ياعني ااك. الايدا ونىڭ مولشەرى ءتىپتى قاراپايىم قاجەتتىلىكتەردى قامتاماسىز ەتۋگە جەتپەيدى. مىسالى، جان باسىنا شاققانداعى تابىسى كەدەيلىك شەگىنەن تومەن 6 ادامنان تۇراتىن وتباسىنا بەرىلەتىن ااك 7 مىڭ تەڭگەدەي عانا", – دەدى دينارا زاكيەۆا.
ءارى قاراي ول كومەككە مۇقتاج بالانى نەمەسە وتباسىن وزدىگىنەن انىقتاپ، كومەك كورسەتۋدىڭ ورنىنا، جۇمىس تەك كەلىپ تۇسكەن وتىنىشپەن جۇرگىزىلىپ جاتقانىن ايتتى. بۇعان دالەل – كەڭەستىڭ ءوزى، وڭىرلەردى ارالاۋ بارىسىندا از ۋاقىت ىشىندە مەملەكەتتىك باعدارلامالار تۋرالى مۇلدەم ەستىمەگەن، قانداي قۇقىقتارىنىڭ بار ەكەندىگىن بىلمەيتىن، قۇجاتتارى جوق بولعان سوڭ قاراپايىم قىزمەتتەر مەن كومەك تۇرلەرىن الا الماي جۇرگەن 200-دەن استام وتباسى.
"ەشقاشان مەكتەپكە بارماعان 10-13 جاستاعى، اۋرۋى بارىنا قاراماستان، تۋعاننان بەرى ەشقانداي مەديتسينالىق تەكسەرۋدەن وتپەگەن بالالاردى كوردىك. بۇل وتباسىلار تۋرالى ۋچاسكەلىك پوليتسەيلەر اكىمدىكتەردى حاباردار ەتسە دە، ولار ادام شوشىرلىق جاعدايدا ءومىر سۇرۋلەرىن جالعاستىرعان. بۇگىندە 1 ملن 145 مىڭ وتباسى داعدارىس جاعدايىندا، ال قولايسىز جاعدايدا دەپ ەسەپتە تۇرعان وتباسىلاردا 12 مىڭ بالا تاربيەلەنىپ جاتىر. ناتيجەسىندە، الەۋمەتتىك ماسەلەلەردىڭ شەشىلمەۋى كوبىنەسە بالا قۇقىقتارىنىڭ بۇزىلۋى مەن قايعىلى سالدارلارعا، ياعني ونىڭ بالالار ۇيىنە تۇسۋىنە جانە زورلىق-زومبىلىققا اكەپ سوعادى. وتكەن جىلى 2 888 بالاعا قارسى قىلمىس جاسالعان. دەمەك، كۇنىنە 6 بالا", – دەپ جازدى دينارا زاكيەۆا.
وسى ورايدا، ول وكىلەتتى ورگانداردىڭ بالالار جىلىنا ارنالعان ءىس-شارالار جوسپارىن ازىرلەپ جاتقانىن ايتىپ، كەلەسى تارماقتاردى قوسۋدى ۇسىندى:
- تۇرمىسى تومەن وتباسىلاردىڭ بالالارىن قولداۋدىڭ تيىمدىلىگىن ارتتىرۋ ءۇشىن ااك-ءتى ءار بالاعا كۇنكورىس مينيمۋمىنا دەيىن ارتتىرۋ. ياعني 1 بالاعا – 36 مىڭ تەڭگە. بۇل ءۇشىن قوسىمشا 225 ملرد تەڭگە كەرەك.
- ەلدىمەكەندەردە وتباسىنا كەشەندى تۇردە كومەكتەسۋ جانە بالا قۇقىقتارى بۇزىلۋىنىڭ الدىن الۋ جونىندەگى وكىلەتتى ورگاندار اراسىندا جۇمىستى ۇيلەستىرىپ وتىراتىن جانە ءتيىمدى ءوزارا ءىس-قيمىلدى قامتاماسىز ەتەتىن وتباسى، جاستار جانە بالالار ىستەرى جونىندەگى دەربەس باسقارما قۇرۋ. تاجىريبە كورسەتكەندەي، كومەك دەر كەزىندە كورسەتىلسە، وتباسى مەن بالانى قيىن ومىرلىك جاعدايدان شىعارۋ ابدەن مۇمكىن. مۇنى كەڭەس باستاماسىمەن قۇرىلعان، قۇرامىنا اكىمدىك وكىلدەرى دە كىرەتىن جەدەل ارەكەت ەتۋ توپتارى جۇمىسىنىڭ ناتيجەسى راستايدى. ماسەلەن،بىلتىردىڭ وزىندە ولار كومەككە مۇقتاج 17 مىڭ وتباسىن انىقتاپ، ولارعا كەشەندى تۇردە كومەك كورسەتتى. 10 مىڭ ادامدى جۇمىسقا ورنالاستىردى، قۇجات، جاردەماقى جانە تۇرعىن ءۇي الۋعا جاردەمدەستى.
- ستراتەگيالىق قۇجاتتاردا كورسەتىلگەن وتباسى ينستيتۋتىن نىعايتۋ، وتباسىلىق قولايسىزدىقتىڭ، تۇرمىستىق زورلىق-زومبىلىقتىڭ جانە بالالارعا قاتىگەز قاراۋدىڭ الدىن الۋ جونىندەگى نىسانالى ينديكاتورلاردى وڭىرلەردىڭ اۋماقتى دامىتۋ جوسپارلارىنا ەنگىزۋ.
”ادىرنا” ۇلتتىق پورتالى
