بۇگىن شىمكەنت قالاسىنىڭ اكىمى مۇرات ايتەنوۆكە جولاۋشىلار كولىگى جانە اۆتوموبيل جولدارى باسقارماسىنىڭ باسشىسى ە. جولداسوۆ اتقارىلعان جانە 2022 جىلى جۇزەگە اسىرىلاتىن جۇمىستار بويىنشا ەسەپ بەردى.
مالىمەت بويىنشا قالادا وسى جىلى 300 شاقىرىم جول جوندەلىپ، اسفالت جول ۇلەسى 67,4 پايىزعا جەتەدى.
«2022 جىلى 141 نىسانعا قۇرىلىس، جوندەۋ جۇمىستارىن اتقارۋدى جوسپارلادىق. اتاپ ايتقاندا 19 نىساندا، ياعني 51,5 شاقىرىم جولعا قۇرىلىس جانە قايتا جاڭارتۋ جۇمىستارى جۇرگىزىلەدى. 223,8 شاقىرىم بولاتىن 291 كوشە ورتاشا جوندەۋدەن وتسە، 19,3 شاقىرىم جولعا كۇردەلى جوندەۋ جۇمىستارى جۇرگىزىلەدى»،-دەدى باسقارما باسشىسى.
سونىمەن قاتار، 150 ورىنعا ايالداما ورناتۋ جانە اۋدان اكىمشىلىگى تاراپىنان بەكىتىلگەن كوشەلەرگە شاعال تاس توسەۋ جوسپارلانۋدا.
2021 جىلى اۆتوموبيل جولدارى سالاسىندا 137 نىساندا (189,7 شق) جوندەۋ جۇمىستارى اياقتالعان. ناتيجەسى بويىنشا قالاداعى اسفالت جولداردىڭ ۇلەسى 63,6% جەتكەن. اسفالت جولدار ۇلەسىن 2022 جىلى 67,4%، 2023 جىلى 71,2%، 2024 جىلى 75%، 2025 جىلى 79% جەتكىزۋ جوسپارلانۋدا.
جول قۇرىلىسى ءوزىنىڭ ءجىتى باقىلاۋىندا بولاتىنىن ايتقان قالا باسشىسى جولدىڭ ساپاسىن قۇرىلىس بىتكەن سوڭ ەمەس كەمشىلىكتەردى الدىن الا انىقتاپ، جويۋ كەرەكتىگىن ەسكەرتتى.
قۇرىلىس-مونتاجداۋ جۇمىستارىن اتقارۋ كەزىندە كەمشىلىكتەرگە جول بەرىلمەۋى كەرەكتىگىن، ونداي قاتەلىكتەر ورىن العاندا مەردىگەر، تەحنيكالىق جانە اۆتورلىق قاداعالاۋشى مەكەمەلەرگە ايىپپۇلدار سالىناتىنىن جەتكىزدى.
ءسوز سوڭىندا اكىم سالا جەتەكشىسىنە اۆتوموبيل جولدارىنىڭ ساپاسىن ارتتىرۋ بويىنشا بىرقاتار تاپسىرمالار بەردى.
شىمكەنت قالاسى اكىمدىگىنىڭ ءباسپاسوز قىزمەتى
