قازاقستان الەمدەگى ەڭ كەدەي نيگەريا ەلىمەن ءبىر دەڭگەيدە تۇر

"دۇنيەجۇزىلىك بانك الەمدەگى  كەدەيلىكتىڭ ەكى شەگىن قاراستىرعان: تابىسى ورتاشادان تومەن ەلدەر ءۇشىن  كۇنىنە ءبىر ادامعا 3,2 اقش دوللارى،  تابىسى ورتاشادان جوعارى ەلدەر ءۇشىن  5,5 اقش دوللارى. ال قازاقستاندا ەڭ تومەنگى كۇنكورىس دەڭگەيى 2,8 دوللار، رەسەيدە كۇنىنە 6 دوللار", - دەدى سايروۆ.

ونىڭ ايتۋىنشا، 2021 جىلى تابىسى كۇنكورىس دەڭگەيىنەن تومەن ادامدار سانى - رەسمي تۇردە 998 مىڭ ادام بولعان. ال بەيرەسمي ساراپشىلار بۇل كورسەتكىشتىڭ 1,5 ملن، ودان دا جوعارى ەكەندىگى ايتىلادى.

"ىشكى جالپى ءونىمنىڭ ەسەلەپ وسۋىنە قاراماستان، قازاقستان ونداعان جىلدار بويى، كەدەيلىك شەگىن كوتەرمەي كەلەدى. بۇگىندە قازاقستان ەڭ تومەنگى كۇنكورىس دەڭگەيى الەمدەگى ەڭ تومەن ەلدەردىڭ ءبىرى جانە نيگەريا، انگولا، ۆەنەسۋەلا، گابون سياقتى ەلدەردىڭ دەڭگەيىندە تۇر. ال ەۋروپالىق  ەلدەردە كەدەيلىك ورتاشا تابىستىڭ 60 پايىز دەڭگەيىندە بەلگىلەنەدى", - دەدى ول.

سونىمەن بىرگە، پاندەميا باستالعاننان بەرى  تۇرمىسى تومەن ءۇي شارۋاشىلىقتارىنىڭ قارجىسىنا نۇقسان كەلتىرەتىن ينفلياتسيانىڭ وسۋىنە بايلانىستى الەۋمەتتىك تولەمدەردىڭ تيىمدىلىگى تومەندەدى، دەدى ول.

"مىسالى، قازاقستاندا حالىقتىڭ ەڭ از قامتىلعان 40 پايىزى ءوز بيۋدجەتىنىڭ 59 پايىزىن ازىق-تۇلىك ونىمدەرىنە جۇمسايدى. كەي كەزدەرى بۇل كورسەتكىش ودان دا جوعارى. ەلىمىزدە ازاماتتاردىڭ  تومەن الەۋمەتتىك جاعدايىنىڭ ەكى ينديكاتورى بار - ەڭ تومەنگى كۇنكورىس شەگى جانە كەدەيلىك شەگى. كەدەيلىك شەگى، ەڭ تومەنگى كۇكورىس شەگىنىڭ، ياعني 36 مىڭ تەڭگەنىڭ 70 پايىزى.

بۇل ەرتەدەگى ۇكىمەتتەردىڭ حالىققا اقشانى از تولەۋ ءۇشىن ىستەپ قويعان "قۋلىعى". ياعني، الەۋمەتتىك كومەك العىڭ كەلسە، ء"سىڭىر كەدەي" بولۋىڭ كەرەك! وسى تاۆتالوگيانىڭ ناتيجەسىندە، 2020 جىلى باعانىڭ تۇراقتى وسۋىنە بايلانىستى الەۋمەتتىك كومەككە  سۇرانىس ءوسىپ، ءزارۋ ادامداردىڭ سانى ارتسا دا، اتاۋلى الەۋمەتتىك كومەكپەن قامتىلعان ادامداردىڭ سانى ازايعان. بۇل فاكتور  ءوز كەزەگىندە ءزارۋ ازاماتتاردىڭ الەۋمەتتىك جاعدايىن مۇلدەمگە تۇرالاتىپ جىبەردى", - دەيدى سايروۆ.

دەپۋتات بۇل فاكتور از قامتىلعان ازاماتتاردىڭ الەۋمەتتىك جاعدايىن تولىعىمەن تۇراقسىزداندىردى دەپ سانايدى.

"Nur-Otan پارتياسىنىڭ فراكتسياسى كەدەيلىكپەن كۇرەسۋ ءۇشىن ۇكىمەت مىناداي شارالار قاراستىرۋى قاجەت دەپ ەسەپتەيدى.

• ەلدەگى جالپى ىشكى ءونىم دەڭگەيىنە، حالىقارالىق ستاندارتتارعا سايكەس قازاقستاندا كەدەيلىك شەگىن ارتتىرۋ. قوعام ىشىندەگى كەدەيلىك تۋرالى كوزقاراسقا سايكەس كەلەتىن، كەدەيلىكتىڭ جاڭا انىقتاماسىن ەنگىزۋ.
• ەڭ تومەنگى كۇنكورىس شەگى مەن كەدەيلىك شەگىن بىرىكتىرە وتىرىپ، ەڭ تومەنگى كۇنكورىس شەگىن ارتتىرۋ.
• ەكى ەڭ تومەنگى جالاقى مولشەرىندە تابىس الاتىن ازاماتتاردى جەكە تابىس سالىعىنان بوساتۋ.
• ەڭ تومەنگى جالاقىنى جىل سايىن يندەكساتسيالاۋ ماسەلەسىن شەشۋ.

ەڭ تومەنگى جالاقى الاتىن ازاماتتاردىڭ جۇمىسسىزدىق بويىنشا ساقتاندىرۋ سوماسىن ارتتىرۋ ارقىلى ساقتاندىرۋ جۇيەسىن جەتىلدىرۋ", - دەدى ول.

“ادىرنا” ۇلتتىق پورتالى