بيىل شىمكەنت قالاسىندا 24 196 جاڭا جۇمىس ورنى اشىلادى دەپ جوسپارلانۋدا. قالالىق جۇمىسپەن قامتۋ ورتالىعىنىڭ مالىمەتىنشە، جاڭا جۇمىس ورىندارىنىڭ 14 مىڭنان استامى تۇراقتى جانە 10 مىڭعا جۋىعى ۋاقىتشا جۇمىس ورىندارى بولماق.
حالىقتى جۇمىسپەن جانە باسپانامەن قامتۋ، الەۋمەتتىك قورعاۋ ماسەلەلەرى بۇگىن قالا اكىمىنىڭ ورىنباسارى ەرعالي بىلىسبەكوۆتىڭ ازاماتتاردى ونلاين قابىلداۋىندا قارالدى. جالپى جۇمىسپەن قامتۋ ورتالىعى جۇمىس بەرۋشىلەر تاراپىنان سۇرانىسقا ساي ۇسىنىلاتىن جۇمىس ورىندارىنا جولدايدى. قابىلداۋدا بولعان تۇرعىنداردىڭ كەيبىرى وزدەرى قالاعان جۇمىس تۇرلەرى تابىلماي جاتاتىندىعىن جەتكىزدى. بۇل ورايدا جاڭادان قۇرىلعالى وتىرعان جۇمىس ورىندارى جۇمىسسىزدىق دەڭگەيىن تومەندەتۋگە سەپتىگىن تيگىزبەك.
ودان بولەك، مەملەكەت باسشىسىنىڭ تاپسىرماسىنا سايكەس بۇل جىلى 18 مىڭنان اسا جاستى جۇمىسپەن قامتۋ شارالارىنا تارتۋ جوسپارلانۋدا.
قابىلداۋ بارىسىندا باسپاناعا مۇقتاج ازاماتتار دا وتىنىشتەرىن جەتكىزدى. ازاماتتاردىڭ ءبىرى ۋاقىتشا باسپانا سۇراسا، ەندى ءبىرى كەزەگىنىڭ كەلمەگەنىنە نارازى.
قالا اكىمىنىڭ ورىنباسارى بۇگىندە تۇرعىن ءۇي كەزەگىنە 48 مىڭنان استام ازامات تىركەلگەنىن، مەملەكەتتىك تۇرعىن ءۇي قورىندا ۋاقىتشا باسپانا قاراستىرىلماعانىن، قازاقستان رەسپۋبليكاسى «تۇرعىن ءۇي قاتىناستارى تۋرالى» زاڭىنا سايكەس مەملەكەتتىك تۇرعىن ءۇي قورىنان تۇرعىن ءۇي بەلگىلەنگەن تارتىپپەن كەزەك ارقىلى بەرىلەتىنىن جەتكىزدى.
ارەندالىق تۇرعىن ۇيلەر كوپبالالى وتباسىلارعا، حالىقتىڭ الەۋمەتتىك جاعىنان ءالسىز توپتارىنا جانە جۇمىس ىستەيتىن جاستارعا بەرىلەدى. ال، بيۋدجەتتىك ۇيىم قىزمەتكەرلەرىنە «نۇرلى جەر» مەملەكەتتىك تۇرعىن ءۇي باعدارلاماسى اياسىندا جەڭىلدەتىلگەن نەسيەلىك باعدارلامالارى ۇسىنىلۋدا.
كەزەكتە تىركەلگەن ازاماتتاردىڭ بارلىعى جەڭىلدەتىلگەن يپوتەكالىق باعدارلامالار بويىنشا باسپانالى بولا الادى. قابىلداۋ بارىسىندا ءار تۇرعىننىڭ ماسەلەسى نازارعا الىنىپ، ءتيىستى باسقارما باسشىلارىنا بىرقاتار تاپسىرمالار بەرىلدى. قالا باسشىسىنىڭ ورىنباسارى ءوز تاراپىنان ءار ازاماتتىڭ ءوتىنىشىن ءجىتى باقىلاۋىنا العان.
شىمكەنت قالاسى اكىمدىگىنىڭ ءباسپاسوز قىزمەتى
