ءماجىلىس دەپۋتاتى قازىبەك يسا نۇرلان نىعماتۋلليننىڭ ورنىنا كەلگەن ەرلان قوشانوۆ جايلى وتە قىزىقتى دەرەكتەر ايتتى، دەپ حابارلايدى “ادىرنا” سايتى.
ءماجىلىستىڭ سۋ جاڭا توراعاسى جايلى دەپۋتات قازىبەك يسا بىلاي دەپتى.
«ەرلان قوشانوۆ — ەڭ الدىمەن ۇلتشىل ساياساتكەر!
وسىدان 4 جىل بۇرىن 2018 جىلى ەرلان قوشانوۆ قاراعاندى وبلىسى اكىمى كەزىندە ءبىز “قازاق ءۇنى” گازەتىندە “ناعىز ەر! وبلىس اكىمى ورىسشا قۇجات سۇراتۋعا تىيىم سالدى”-دەگەن ماقالا جازدىق.
وندا “قاراعاندى وبلىسىنىڭ اكىمى ەرلان قوشانوۆ ورىس تىلىندە قۇجات سۇراتۋعا تىيىم سالدى. بۇل تۋرالى يۋتۋب الەۋمەتتىك جەلىسىندە تارالعان بەينە جازبادا ايتىلعان”، — دەپ جازىپ، ۆيدەونى سالدىق سايتىمىزعا.
سايتىمىزدا ءبىر كۇندە 30 مىڭعا جۋىق ادام وقىپ، جۇزدەگەن قولداۋ پىكىر جازىلدى. قازىر قاراسام، 61 305 ادامعا جەتىپتى وقىعاندار. فەيسبۋكتاعى پاراقشامىزدا دا جۇرت مىڭداعان قولداۋ ءبىلدىردى.
سارىارقانىڭ سايىن دالاسىندا ات قۇلاعىندا ويناپ وسكەن ەرەكەڭنىڭ دومبىرانىڭ قۇلاعىندا دا وينايتىن داۋلەسكەر كۇيشى ەكەنىن ەكىنىڭ ءبىرى بىلە بەرمەيدى.
ەرلان قوشانوۆتىڭ اكىم كەزىندە قاراعاندى وبلىسىندا ۇلتتىق يدەولوگيالىق، رۋحاني شارالار دۇرىلدەپ ءوتىپ تۇردى. قاراعاندىنىڭ قاق تورىنە قازاقتىڭ اقيىق اقىنى قاسىمنىڭ ەسكەرتكىشى بوي كوتەردى. قاز داۋىستى قازىبەك ءبيدىڭ مەرەيتويى، تب مادەني-رۋحاني شارالار ەلدىڭ ەرەكشە ىقىلاسىن وياتتى. ۇلتتىق رۋحاني ءنار العان ءوڭىردىڭ الەۋمەتتىك-ەكونوميكالىق الەۋەتى دە ارتىپ، ەل ەڭسەسى كوتەرىلىپ قالعان ەدى. سوندىقتان دا ەرلان قوشانوۆ اكىمدەر رەيتينگىندە الدىڭعى قاتاردان تۇسپەي كەتتى.
پرەزيدەنت اكىمشىلىگى جەتەكشىسى رەتىندە دە ەلىمىز تاريحىنداعى ەڭ ءبىر قيىن كەزەڭدەردە پرەزيدەنت قاسىم-جومارت توقاەۆتىڭ ءۇمىتىن اقتاپ، سەنىمدى سەرىگى بولا ءبىلدى.
ەرەكەڭنىڭ بويىنداعى ۇلتشىلدىق-مەملەكەتشىلدىك قاسيەت ەندى پارلامەنتتە دە ءوز جەمىسىن بەرەدى دەپ سەنەمىز. ءماجىلىس توراعاسى رەتىندە العاشقى ءسوزىن تەك مەملەكەتتىك تىلدە ايتقانى دا كوپ ءجايتتى اڭعارتسا كەرەك.
ەرلان جاقانۇلىنا زاڭ شىعارۋشىلىق جۇمىس تاڭسىق ەمەس. ول 1995 جىلى 33 جاسىندا العاشقى سەناتورلاردىڭ ءبىرى بولدى. كەيىن دە ۇكىمەتتىڭ پارلامەنتتەگى وكىلى بولىپ قىزمەت اتقارعان. ەلىمىزدەگى جوعارى لاۋازىمدىق قىزمەتتە ەرەكەڭە اق جول تىلەيمىز!
پارلامەنت ءماجىلىسىن تۋرا ون جىل باسقارعان نۇرلان نىعماتۋلينمەن دەپۋتاتتار تىك تۇرىپ قوشتاسىپ، قوشەمەت ءبىلدىرىپ شىعارىپ سالدى. سودان-اق نۇرلان زايرۋللاۇلىنىڭ قانداي سپيكەر بولعانىن بىلۋگە بولاتىن شىعار.
بۇرىن ماجىلىسكە تويعا كەلگەندەي جايلانىپ كەلەتىن مينيسترلەر نۇرەكەڭنىڭ كەزىندە ويلانىپ كەلەتىن بولدى… ولاردىڭ بايانداماسىن باسىنان اياعىنا دەيىن جىلىكتەپ شاعىپ، كەمشىلىگىن جىپكە ءتىزىپ بەرگەندە، جىپتىكتەي بولعان مينيسترلەر تەمىر توراعانىڭ الدىندا ەمتيحان تاپسىرعان وقۋشىلارداي بولىپ تۇراتىن…
نۇرەكەڭە دە اق جول تىلەيمىز.
ءيا، پارلامەنت ەڭ الدىمەن حالىقتىڭ قامىن، ۇلتتىڭ مۇددەسىن قورعاۋى ءتيىس!
ەل امان، جۇرت تىنىش بولسىن!».
ءماجىلىس دەپۋتاتى
قازىبەك يسا
