Májilis depýtaty Qazybek Isa Nurlan Nyǵmatýllınniń ornyna kelgen Erlan Qoshanov jaıly óte qyzyqty derekter aıtty, dep habarlaıdy “Adyrna” saıty.
Májilistiń sý jańa tóraǵasy jaıly depýtat Qazybek Isa bylaı depti.
«Erlan Qoshanov — eń aldymen ultshyl saıasatker!
Osydan 4 jyl buryn 2018 jyly Erlan Qoshanov Qaraǵandy oblysy ákimi kezinde biz “Qazaq úni” gazetinde “Naǵyz ER! Oblys ákimi oryssha qujat suratýǵa tyıym saldy”-degen maqala jazdyq.
Onda “Qaraǵandy oblysynyń ákimi Erlan Qoshanov orys tilinde qujat suratýǵa tyıym saldy. Bul týraly ıýtýb áleýmettik jelisinde taralǵan beıne jazbada aıtylǵan”, — dep jazyp, vıdeony saldyq saıtymyzǵa.
Saıtymyzda bir kúnde 30 myńǵa jýyq adam oqyp, júzdegen qoldaý pikir jazyldy. Qazir qarasam, 61 305 adamǵa jetipti oqyǵandar. Feısbýktaǵy paraqshamyzda da jurt myńdaǵan qoldaý bildirdi.
Saryarqanyń saıyn dalasynda at qulaǵynda oınap ósken Erekeńniń dombyranyń qulaǵynda da oınaıtyn dáýlesker kúıshi ekenin ekiniń biri bile bermeıdi.
Erlan Qoshanovtyń ákim kezinde Qaraǵandy oblysynda ulttyq ıdeologııalyq, rýhanı sharalar dúrildep ótip turdy. Qaraǵandynyń qaq tórine qazaqtyń aqıyq aqyny Qasymnyń eskertkishi boı kóterdi. Qaz daýysty Qazybek bıdiń mereıtoıy, tb mádenı-rýhanı sharalar eldiń erekshe yqylasyn oıatty. Ulttyq rýhanı nár alǵan óńirdiń áleýmettik-ekonomıkalyq áleýeti de artyp, el eńsesi kóterilip qalǵan edi. Sondyqtan da Erlan Qoshanov ákimder reıtınginde aldyńǵy qatardan túspeı ketti.
Prezıdent ákimshiligi jetekshisi retinde de elimiz tarıhyndaǵy eń bir qıyn kezeńderde Prezıdent Qasym-Jomart Toqaevtyń úmitin aqtap, senimdi serigi bola bildi.
Erekeńniń boıyndaǵy ultshyldyq-memleketshildik qasıet endi Parlamentte de óz jemisin beredi dep senemiz. Májilis tóraǵasy retinde alǵashqy sózin tek memlekettik tilde aıtqany da kóp jáıtti ańǵartsa kerek.
Erlan Jaqanulyna zań shyǵarýshylyq jumys tańsyq emes. Ol 1995 jyly 33 jasynda alǵashqy senatorlardyń biri boldy. Keıin de úkimettiń parlamenttegi ókili bolyp qyzmet atqarǵan. Elimizdegi joǵary laýazymdyq qyzmette Erekeńe Aq jol tileımiz!
Parlament Májilisin týra on jyl basqarǵan Nurlan Nyǵmatýlınmen depýtattar tik turyp qoshtasyp, qoshemet bildirip shyǵaryp saldy. Sodan-aq Nurlan Zaırýllaulynyń qandaı spıker bolǵanyn bilýge bolatyn shyǵar.
Buryn Májiliske toıǵa kelgendeı jaılanyp keletin mınıstrler Nurekeńniń kezinde oılanyp keletin boldy… Olardyń baıandamasyn basynan aıaǵyna deıin jiliktep shaǵyp, kemshiligin jipke tizip bergende, jiptikteı bolǵan mınıstrler temir tóraǵanyń aldynda emtıhan tapsyrǵan oqýshylardaı bolyp turatyn…
Nurekeńe de Aq jol tileımiz.
Iá, Parlament eń aldymen halyqtyń qamyn, ulttyń múddesin qorǵaýy tıis!
El aman, jurt tynysh bolsyn!».
Májilis depýtaty
Qazybek ISA
