سان الۋان وزەكتى ماسەلەلەردىڭ بارىنە ءوزىنىڭ ەلدى باسقارۋشى رەتىندەگى ۇستانىمى تاباندى ەكەنى كورىندى. ميسسياسىنىڭ ءوزى مەملەكەت پەن قوعامدى دۇرىس جولعا قويۋ ەكەنىن جۇقالاپ جەتكىزىپ وتىر. اسىپ-تاسپاي، ءار نارسەنى جونىمەن، دايەكتى ەتىپ جەتكىزەتىن مادەنيەتى باسشى اتاۋلىعا ۇلگى بولارلىق دەۋگە دە كەلەدى ەكەن. ال ەڭ باستىسى – الەمگە دە، جەكەلەگەن تۇلعالارعا دا جالتاقتاماۋ، ءوز ەلىمىزدىڭ مۇددەسىن بارىنەن جوعارى قويۋ مىنەزىن اڭعارتقان سياقتى.
سۇحباتتىڭ ورىسشا بەرىلگەنىن جاقتىرماعاندار از ەمەس، ارينە. دەگەنمەن ورىسشا بەرىلگەن سۇحباتىنىڭ لەزدە الەمگە تارايتىن جاعى تاعى بار ەمەس پە. ءارى كەلگەن جۋرناليست قازاقستاندىق ورىس بولسا... وزگە شەت ەلدەردەن سۇرانعان سۇحباتتاردان باس تارتىپ كەلگەن ەكەن، وسى جولى كەلىسىم بەرىپتى. پرەزيدەنتتىڭ ءباسپاسوز حاتشىسى بەرىك ءۋالي الەۋمەتتىك جەلىدەگى جازباسىندا پرەزيدەنتتىڭ كەلەسى سۇحباتى مىندەتتى تۇردە قازاق تىلىندە جۇرگىزىلەتىنىنە ۋادە ەتتى.
سونىمەن، پرەزيدەنتتىڭ سۇحباتى توڭىرەگىندە تاڭدى تاڭعا اسىرىپ ايتا بەرۋگە بولادى. قازاقستاننىڭ بارشا بۇقارالىق اقپارات قۇرالدارى مەن سايتتارى تاقىرىپتاردى جىكتەپ ءۇستى-ۇستىنە ماقالانى قارشا بوراتىپ جاتىر. ءبىز سۇحباتتىڭ ءبىر عانا قىرىنا توقتالا كەتۋدى ءجون كوردىڭ. ول – مەملەكەت باسشىسىنىڭ وزبەك ميللياردەرلەرىن ۇلگى ەتۋى. نەسى بار، وتە دۇرىس ءسوز. وزبەكتىڭ سىرتتا جۇرگەن ميللياردەرلەرى تاشكەنتكە كەلىپ، وزبەكستان پرەزيدەنتىنە «تۋعان جەرىمىزگە قانداي جاقسىلىق جاساۋىمىزعا كەڭەس بەرەسىز؟» دەپ سۇرايدى ەكەن. سودان كەيىن وزدەرىنىڭ قاراجاتتارى ەسەبىنەن حالىققا اۋرۋحانالار، ينفراقۇرىلىمدار سالىپ بەرەدى. ءبىزدىڭ ەلىمىز دە شەتتە جۇرگەن دە، ىشتە جۇرگەن دە ميللياردەرلەردەن كەندە ەمەس. الايدا ولاردىڭ حالقىمىزعا جاعداي جاسايىق دەپ الىپ-ۇشىپ تۇرعاندارى بايقالا بەرمەيتىنى دە راس قوي. كەرىسىنشە، شەتكە قىرۋار قارجىنى الىپ كەتكەن ميللياردەرلەرىمىز قولدارىنان كەلسە سىرتتا وتىرىپ ءوز ەلىمىزدى تۇقىرتىپ-مۇقاتۋعا بەيىم تۇراتىن ساتتەرى جوق ەمەس-اۋ.
وسى ورايدا ءبىز وزبەكستاننىڭ بايلارى جايلى تانىمدىق سيپاتتاعى ازدى-كوپتى مالىمەت بەرە كەتسەك دەيمىز. الەمدەگى ەڭ باي 10 وزبەك مىنا كىسىلەر: اليشەر ۋسمانوۆ. 1953 جىلى نامانگان وبلىسىندا دۇنيەگە كەلگەن، رەسەيدەگى USM Holdings كومپانياسىنىڭ نەگىزىن قالاۋشى. USM – مەتاللۋرگيا جانە تاۋ-كەن ءوندىرىسى، تەلەكوممۋنيكاتسيا جانە تەحنولوگيالار سالالارىنداعى اكتيۆتەردى باسقاراتىن رەسەي حولدينگى. 2012-2015 جىلدار ارالىعىندا قاتارىنان رەيتينگ بويىنشا 20 ميلليارد دوللارلىق داۋلەتىمەن رەسەيدىڭ ەڭ باي ادامى اتانعان. يسكاندەر ماحمۋدوۆ – رەسەي بيزنەسمەنى، تاۋ-كەن كومپانياسىنىڭ نەگىزىن قالاۋشى ءارى پرەزيدەنتى، ميللياردەر. 1963 جىلى بۇحارا وبلىسىندا تۋعان. فاتتاح (پاتوح) شوديەۆ – قازاقستان ميللياردەرى، وزبەكستاننىڭ جىزاق وبلىسىندا 1953 جىلى تۋعان. اليجان يبراگيموۆ– قازاقستان بيزنەسمەنى، 1953 جىلى فەرعانا وبلىسىندا تۋعان. ميللياردەر. تاشكەنتتە تۇراتىن اتىشۋلى بايباتشا ساليم ابدۋۆاليەۆ – وتە ىقپالدى بيزنەسمەن، اقش-تىڭ كوزىمەن وزبەكستانداعى كريمينالدىق اۆتوريتەتتەردىڭ ليدەرى دەپ قاراستىرىلادى. 1950 جىلى فەرعانا وبلىسىندا تۋعان. گافۋر-ارسلانبەك راحيموۆ –1951 جىلى تاشكەنتتە تۋعان. وزبەكستان بيزنەسمەنى، شىعىس ەۋروپالىق حالىقارالىق «Brothers’ Circle» (برازەرس تسوركل — وقىلۋى) توبىنىڭ باسشىلارىنىڭ ءبىرى. بيزنەسى رەسەيمەن جانە ەۋروپا ەلدەرىمەن بايلانىستى. اقش-تىڭ كوزىمەن تمد ەلدەرىنىڭ قىلمىس الەمىنىڭ وكىلدەرى توپتاسقان «براتسكي كرۋگ» قىلمىستىق توبىنىڭ جەتەكشىلەرىنىڭ ءبىرى رەتىندە قاراستىرىلادى. قادىرجان باتىروۆ – قىرعىزستاننىڭ ۇلتى وزبەك بيزنەسمەنى، قىرعىزستان جوگوركۋ كەنەشىنىڭ ەكس-دەپۋتاتى، 1956 جىلى تۋعان. بايلىعى 400 ميلليون دوللار. جاپپاي تارتىپسىزدىكتەرگە بايلانىستى ۇستىنەن قىلمىستىق ءىس قوزعالعاننان كەيىن، شۆەتسيادان ساياسي باسپانا سۇراعان. شۆەتسيادا تۇرادى.
ەڭ باي 10 وزبەك بايلارىنىڭ قاتارىنا ەكس-پرەزيدەنت يسلام كاريموۆتىڭ بۇرىنعى كۇيەۋ بالاسى، 1966 جىلى اۋعانستاندا تۋعان، وسى كۇنى نيۋ-يوركتا تۇراتىن مانسۋر ماكسۋدي, وزبەكستاننىڭ تۇتقىنعا الىنعان بيزنەسمەنى، مەنشىگىندە فيليالدار جۇيەسى بار بانك، رەستوراندارى مەن «وزبەكستان» قوناقۇيى، «پاحتاكور» فۋتبول كلۋبى بولعان، «زاڭداعى ۇرى» اتانعان باتىر راحيموۆ, وزبەكستان بيزنەسمەنى احمادبوي چينازسكي بار.
بۇل اتالعاندار وزبەكستاننىڭ بەتكە ۇستار تەك 10 وزبەك بيزنەسمەنى. ولاردان بولەك بايلار قانشاما. ءتىپتى امەريكادا سۋپەرماركەتتەر، رەستوراندار جۇيەسىن جۇرگىزىپ وتىرعان وزبەكتەر دە از ەمەس. سولاردىڭ كوپشىلىگى اتامەكەنىنەن ەشتەڭەنى ايامايدى. ال وزبەكستاننىڭ وزىندەگى دوللارلىق ميلليونەرلەردىڭ ىشىندە جەتەۋىنىڭ جاسى 25 پەن 30 ارالىعىندا ەكەن. تاعى بىرەۋىنىڭ جاسى 35-تە. ولاردىڭ اكتيۆتەرىندە ميلليونداعان دوللار قارجىدان بار.
قازاقتىڭ بايلارى ەلگە كومەكتەسپەي ءجۇر دەمەيمىز. كومەكتەسىپ جاتقاندارى دا بار. دەگەنمەن وزبەك بايلارىنىڭ ءوز ەلىنە دەگەن مىرزالىعى ءبىزدىڭ باي-باعلاندارىمىزعا دا ۇلگى ءھام جۇعىستى بولعاي.
دەرەككوز: inbusiness.kz
