شىمكەنتتە رەۆاكتسيناتسيا جۇمىسى قارقىندى ءجۇرىپ جاتىر. بۇگىن شىمكەنت قالالىق №1 ەمحانادا ەرىكتى جاستار رەۆاكتسيناتسيا جاساتتى.
— جوسپار بويىنشا ءبىرىنشى جارتىجىلدىقتا №1 ەمحاناعا تىركەلگەن 9 مىڭداي ادام رەۆاكتسيناتسيادان ءوتۋى ءتيىس. رەۆاكتسيناتسيا كەزەڭى باستالعالى بەرى 3200 كىسى ەكپە الدى. ەمحانادا «Pfizer»، «Vero Cell»، «سپۋتنيك لايت» ەكپەلەرى بار. ەكپەدەن كەيىن ءار پاتسيەنتتى باقىلاۋ پۋنكتىندە قاداعالايمىز. ەرىكتىلەردەن رەۆاكتسيناتسيادان كەيىن ەشقانداي كەرى اسەرى بايقالعان جوق، - دەدى شىمكەنت قالالىق №1 ەمحانانىڭ باس دارىگەرى ماحامبەت بەيسەۋوۆ.
كوروناۆيرۋسقا قارسى رەۆاكتسيناتسياعا كەلگەن ەرىكتى قالامقاس كەرىمبايدىڭ ايتۋىنشا، ەكپەنىڭ العاشقى ەكى كومپونەنتىن قابىلداعاندا كەرى اسەرى بولماعان.
— رەۆاكتسيناتسياعا ءوز قالاۋىممەن كەلىپ تۇرمىن. سەبەبى، دەنساۋلىققا بەي-جاي قاراۋعا بولمايدى. پاندەميانى ەكپەنىڭ كومەگىمەن عانا جەڭەتىنىمىزگە سەنەمىن. سوندىقتان زامانداستارىمدى ەكپە الۋعا جانە 6 ايدان سوڭ رەۆاكتسيناتسيادان وتۋگە شاقىرامىن، - دەيدى ول.
ايتا كەتەيىك، قالاداعى ەمحانالاردا 12-18 جاس ارالىعىنداعى وقۋشىلارعا، جۇكتى جانە بوسانعان ايەلدەرگە «Pfizer» ۆاكتسيناسى سالىنىپ جاتىر. سونداي-اق، ەكپەنىڭ بۇل ءتۇرى 60 جاستان اسقان ەگدە كىسىلەرگە رەۆاكتسيناتسيا ءۇشىن ۇسىنىلىپ وتىر.
«شىمكەنت كەلبەتى» — اقبوپە ەرگەش
