بيىل جۋرناليستيكا ماماندىعىنىڭ پاندىك وليمپياداسى ە.ا.بوكەتوۆ اتىنداعى قاراعاندى مەملەكەتتىك ۋنيۆەرسيتەتىندە وتكىزىلىپ جاتىر. ءبىلىم بايگەسىنە ەلىمىزدىڭ 16 ۋنيۆەرسيتەتىندە وقيتىن 48 ستۋدەنت باق سىناۋدا.
2008 جىلى ءال-فارابي اتىنداعى قازۇۋ دا باستاۋ العان وليپيادانىڭ ماقساتى –
جۋرناليستيكا ماماندىعىنىڭ ساپاسىن ارتتىرۋ، تالانتتى دا ءبىلىمدى، ۇزدىك ستۋدەنتتەردى انىقتاۋ، بولاشاق جۋرناليستەردى دايارلايتىن وقۋ ورىندارىنىڭ بىلىكتىگىن ارتتىرۋدى كوزدەيدى.
"پاندىك وليمپياداعا العاشقى رەت ءال-فارابي اتىنداعى قازۇۋ دا قاتىسقان ەدىك. ول كەزدەگى ستۋدەنتتەر مەن قازىرگى ستۋدەنتتەردى سالىستىرۋعا بولمايدى. سەبەبى، قازىرگى جاستار جان-جاقتى، كرەاتيۆتى ويلاۋ قابىلەتى جوعارى، ىزدەنىستەرى مول ەكەنىن بايقادىم. سونىمەن قاتار، بيىلعى وليمپيادانىڭ قازاق تەلەۆيزياسىنىڭ 60 جىلدىعىنا ارنالۋى بولاشاق جۋرناليستەردىڭ ۇلتتىق تەلەۆيزيا تاريحىن تەرەڭدەپ بىلۋىنە ءوز اسەرىن تيگىزدى", – دەيدى، ءال-فارابي اتىنداعى قازۇۋ-دىڭ اعا وقىتۋشىسى جانىبەك عالىمۇلى.
وليپيادا قاتىسۋشىلارى ەكى كەزەڭ بويىنشا سىنالادى. اۋەلى جۋرناليستەر «تەلەۆيزيا جانە ءداۋىر» تاقىرىبىنا ارنالعان بەينەسيۋجەتتەر ارقىلى جۋرناليستىك شەبەرلىكتەرىن كورسەتەدى. ودان كەيىنگى كەزەڭدە، «قازاق جۋرناليستيكاسىنىڭ تاريحى»، «قازىرگى جۋرناليستيكانىڭ جانرلىق پىشىندەرى مەن قىزمەتى»، «تەلەراديوجۋرناليستيكا» پاندەرى بويىنشا تەست سۇراقتارىنا جاۋاپ بەرەدى. سونداي-اق، اقپاراتتىق سايتتارعا جەدەل اقپارات جاريالاۋ مىندەتى دە جۇكتەلەدى.
ۇيىمداستىرۋشىلار پاندىك وليپيادانىڭ قاتىسۋشىلارى جىل وتكەن سايىن كوبەيىپ كەلە جاتقاندىعىن ايتادى.
"پاندىك وليمپياداعا ءبىرىنشى رەت قاتىسىپ وتىرمىن. «تەلەۆيزيا جانە ءداۋىر» اتتى تاقىرىپ ءبىزدىڭ شىعارماشىلىعىمىزدى شىڭداۋعا ۇلكەن مۇمكىندىك بەردى. تەلەۆيزيانىڭ تاريحىمەن جانە جاھاندانۋ ۇردىسىندەگى جەتىستىكتەرىمەن تانىستىق. كوپتەگەن دوستار تاۋىپ، ءوزىمىزدى كاسىبي جۋرناليست سەزىنە باستادىق. وسى ورايدا، تاجىريبەلى جۋرناليستەردىڭ شەبەرلىك سىنىپتارىنا دا قاتىسامىز", – دەيدى، م.ح.دۋلاتي اتىنداعى تارمۋ-دىڭ 2 كۋرس ستۋدەنتى ساندىبەك پرەنوۆ.
وليپياداعا قاتىسقان 16 كوماندانىڭ ىشىنەن تەك 6 كوماندا عانا ماراپاتتالادى. سونداي-اق، وليپيادا كۋبوگىن ۇتىپ العان وقۋ ورنى كەزەكتى سايىستى ۇيىمداستىرادى.
«ءال-فارابي» كومانداسى
