تۇركىستاندىق پوليتسەيلەر تۇرعىننىڭ 25 جىل بۇرىن جوعالىپ كەتكەن ءىنىسىن تابۋعا كومەكتەستى، دەپ حابارلايدى «ادىرنا» ءتىلشىسى Polisia.kz-كە سىلتەمە جاساپ.
تۇركىستان وبلىسى پوليتسيا دەپارتامەنتى كپب-نىڭ قىزمەتكەرلەرى جەدەل ارەكەت ەتىپ، ءبىر كۇننىڭ ىشىندە ءبىر-ءبىرىن 25 جىل كورمەگەن باۋىرلاردى قاۋىشتىردى. وسىلايشا، پوليتسياعا مۇلدەم ارىزدانباعان بوتاكوز تولىباەۆاعا باۋىرى تابىلعانى جونىندە حابار جەتتى.
ناقتىراق ايتساق، وبلىستىق پوليتسياعا جەرگىلىكتى تۇرعىن حابارلاسىپ، تولەبي اۋدانىنداعى اۋىلداردىڭ بىرىندە جىگىتتى تۇتقىندا ۇستايتىندىعى تۋرالى ارىز تۇسىرگەن. اتالعان جايتتى پوليتسەيلەر قر قك 126-بابى (زاڭسىز باس بوستاندىعىنان ايىرۋ) بويىنشا تۇركىستان وبلىسى پد-عا تىركەدى.
اقپارات الىسىمەن دەپارتامەنت قىزمەتكەرلەرى بارلىق قاجەتتى تەرگەۋ ارەكەتتەرىن شۇعىل اتقاردى. ناتيجەسىندە، پوليتسەيلەر جىگىتتىڭ اتا-اناسى كىشكەنتاي كەزىندە قايتىس بولعانىن، سودان ول بالالار ۇيىندە، سونداي-اق ينتەرناتتا تاربيەلەنگەنىن انىقتادى. ەر جەتكەن سوڭ، 10 جىل بويى وبلىس اۋداندارىنداعى ءتۇرلى شارۋاشىلىقتاردا جالدامالى جۇمىسشى بولعانى جانە جۇمىس بەرۋشىلەر تاراپىنان ازاپ كورگەنى بەلگىلى بولدى. سونداي-اق، جىگىتتىڭ ەسىندە ءوزىنىڭ جاقىن تۋىستارى مۇلدەم ساقتالماعان. بىرنەشە ساعات بويى جان-جاقتى جۇرگىزىلگەن ءىس-شارالار ناتيجەسىندە پوليتسەيلەر تۇركىستان قالاسىنىڭ جانىنداعى ساۋران اۋدانىندا تۇراتىن جاس جىگىتتىڭ تۋىستارىن تاپتى.
بەلگىلى بولعانداي، ايەل بىرنەشە جىل بويى جوعالعان ءىنىسىن وزدىگىنەن ىزدەپ، تابا الماعان. باۋىرىمەن قاۋىشقان اپكەسى بوتاكوزدىڭ ايتۋىنشا، ولاردىڭ اتا-انالارى بالا كەزدە قايتىس بولعان. ال تۋىس اعاسى ونىڭ ەكى باۋىرىن بالالار ۇيىنە وتكىزگەن. سول كەزدە ۇلكەنى 9 جاستا، كىشىسى ءتورت جاستا ەكەن. كەيىننەن ولاردىڭ ەڭ كىشىسىنەن قول ءۇزىپ، ءىزىن جوعالتىپ، حابارسىز قالعان. سودان ءىنىسىن تابۋعا 2020 جىلدان باستاپ كىرىسكەن. الايدا پوليتسيانىڭ كومەگىنە جۇگىنبەگەن، مۇلدەم ارىزدانباعان. ەسەسىنە، تو پد پوليتسەيلەرى وعان حابارلاسىپ، ءىنىسىن تاپقانى تۋرالى جاعىمدى جاڭالىق جەتكىزدى. تۋىستارى تۇركىستان وبلىسى پد پوليتسەيلەرىنە، كوپ جىل بۇرىن جوعالىپ كەتكەن ءىنىسىن تاۋىپ، ماسەلەلەرىنە نازار اۋدارعان جاناشىرلىعى ءۇشىن العىسىن ءبىلدىردى.
– ريزامىز، تۇركىستان وبلىسىنىڭ پوليتسەيلەرىنە. بالا كەزدە كوز جازىپ قالعان باۋىرىمدى تاۋىپ بەرگەنىنە. ءىنىمدى كورىپ، ءوزىمدى ومىردەگى ەڭ باقىتتى جان سەزىنىپ وتىرمىن. 25 جىل بويى وسى ءساتتى قانشا ارمانداپ، كۇتتىم. بۇگىن مىنە امان-ەسەن، جىگىت بولعان ىنىممەن كەزدەستىم. قۋانىشىمدا شەك جوق، – دەدى تۇرعىن.
ءوز كەزەگىندە تەرگەۋشىلەر وسى جايت بويىنشا مۇقيات تەرگەۋ جۇرگىزىپ، وقيعانىڭ تولىق ءمان-جايىن انىقتايتىن بولادى.
«ادىرنا» ۇلتتىق پورتالى
