27 قاڭتاردا كەشكى ۋاقىتتا قىرعىز-تاجىك شەكاراسىنداعى جاعداي كۇرت ناشارلادى، - دەپ حابارلايدى “ادىرنا” ۇلتتىق پورتالى Tengrinews.kz سايتىنا سىلتەمە جاساپ.
قىرعىزستان ۇقك شەكارا قىزمەتىنىڭ مالىمەتىنشە، بەيسەنبىدە ساعات 17:30 - دان 18:00-گە دەيىن تاجىكستان شەكاراشىلارى باتكەن اۋدانى ءتورت-كوچو ەلدى مەكەنىندەگى باتكەن-يسفان اۆتوجولىنىڭ بولىگىندەگى جول ۋچاسكەسىن بىرجاقتى تارتىپپەن جاۋىپ تاستاعان.
"قىرعىز رەسپۋبليكاسى مەن تاجىكستان شەكارا وكىلدەرى اراسىندا جۇرگىزىلگەن كەلىسسوزدەردىڭ قورىتىندىسى بويىنشا جول ۋچاسكەسى قايتا اشىلدى. الايدا، ساعات 19:35-تە تاجىكستان تاراپى باتكەن اۋدانىنىڭ چىر-دوبو ەلدى مەكەنىندەگى شەكارا بولىمشەلەرى بويىنشا قارۋ قولدانۋعا بايلانىستى جاعداي ناشارلادى", - دەپ حابارلادى ۇقك ءباسپاسوز قىزمەتى.
قىرعىزستان مەن تاجىكستان شەكارا اسكەرلەرىنىڭ بولىمشەلەرى اراسىنداعى نەگىزگى اتىس ءتورت-كوچو جانە چىر-دوبو ەلدى مەكەندەرىندە ءوتىپ جاتقانى ايتىلادى. "تاجىك تاراپى مينومەتتەر مەن گراناتومەتتەردى پايدالانىپ جاتىر", - دەپ اتاپ ءوتتى ۆەدومستۆوداعىلار.
Turmush مالىمەتتەرى بويىنشا، قىرعىز-تاجىك شەكاراسىنداعى قاقتىعىس ايماعىنان تۇرعىنداردى ەۆاكۋاتسيالاۋ باستالعان. شەكارا ماڭىنداعى تۇرعىنداردىڭ ءبىرىنشى توبى پرەزيدەنتتىڭ باتكەن وبلىسىنداعى وكىلەتتى وكىلدىگىنىڭ عيماراتىنا جەتكىزىلگەن. جەرگىلىكتى بيلىك ەۆاكۋاتسيالانعان ادامدارعا ءۇي-جايلاردى دايىنداپ جاتىر.
“ادىرنا” ۇلتتىق پورتالى
