"امانات" قوعامدىق كوميسسياسى نەگىزسىز قۋدالاۋعا ۇشىراعان 10-نان استام ازاماتتى بوساتىپ الدى

4457
Adyrna.kz Telegram

قاڭتار وقيعالارىنا بايلانىستى نەگىزسىز قۋدالاۋعا ۇشىراپ جاتقان ازاماتتاردىڭ قۇقىعىن قورعاپ، بوستاندىققا شىعارۋ ماقساتىندا قۇرىلعان «امانات» قوعامدىق كوميسسياسى جۇمىسىن باستادى، دەپ حابارلايدى "ادىرنا" ۇلتتىق پورتالى. 

كوميسسيانىڭ ماقساتى: قاڭتار وقيعاسى كەزىندە بولعان جاعدايلارعا بايلانىستى بۇگىنگى كۇنى قۋدالاۋشىلىق كورىپ، تەرگەۋدە جۇرگەن ازاماتتار اراسىنان قىلمىستىق پيعىلى بولماعان نەمەسە وسى جاعدايعا كەزدەيسوق تاپ بولعان، تەك بەيبىت شەرۋگە شىققانداردى انىقتاپ، ولاردىڭ جازىقسىز جاپا شەكپەۋى ءۇشىن مەيلىنشە كومەك بەرىپ، قىلمىستىق قۋدالاۋشىلىق قىسىمنان الىپ شىعۋ.

قاڭتار وقيعاسى كەزىندە عيماراتتاردىڭ ورتەنگەنى، قيراتىلىپ، توناۋعا ۇشىراعانى، ادام شىعىنى بولعانى بۇلجىماس فاكت. وسى ورايدا قاراپايىم حالىقتى پايدالانىپ، ارام پيعىلدارىن ىسكە اسىرماق بولعان قىلمىستىق توپ نەمەسە ەكسترەميستەر انىقتالىپ، ءتيىستى جازاسىن الۋى كەرەك دەپ سانايمىز. ال ءبىز قۇرعان كوميسسيانىڭ ماقساتى وسى قاندى وقيعا بارىسىندا بەيبىت شەرۋگە شىققان ادال نيەتتى ازاماتتار مەن ارام پيعىلدى قاسكويلەردىڭ ارا جىگىن اجىراتۋ. جازىقسىز جانداردىڭ جاپا شەكپەۋىنە، قۋدالانباۋىنا، زاڭمەن قورعالۋىنا بارىنشا كومەك كورسەتۋ. ۇيىندە الاڭداپ كۇتىپ وتىرعان بالا-شاعاسىمەن، اتا-اناسىمەن، جان-جارىمەن امان-ەسەن قاۋىشۋىنا جاردەم بەرۋ.

كوميسسيا قۇرامىندا بارلىعى 8 ادام. ونىڭ تورتەۋى كاسىبي ادۆوكات، ءبىر قر پارلامەنتى ءماجىلىسىنىڭ دەپۋتاتى، ءبىر ۇلتتىق قوعامدىق كەڭەستىڭ مۇشەسى، باس پروكۋراتۋرا مەن ىشكى ىستەر مينيسترلىگىنىڭ ءبىر-ءبىر وكىلى.

"كوميسسيانىڭ قۇرىلۋىنا بايلانىستى قۇقىق قورعاۋشىلاردى، قوعام بەلسەندىلەرىن، باق وكىلدەرى مەن بارشا ازاماتتاردى وسى يگى ءىس توڭىرەگىندە بىرىگۋگە، ماڭىزدى جۇمىسقا جۇمىلا اتسالىسۋعا شاقىرامىز!", دەدى ابزال قۇسپان"

ال بۇگىن، ياعني 25 قاڭتاردا ابزال قۇسپان Facebook جەلىسىندەگى پاراقشاسىندا 11 ادامدى بوساتىپ العاندارى تۋرالى جازبا جاريالادى.

«11 ادامدى بوساتىپ الدىق. دەنساۋلىق جاعدايىنا بايلانىستى. ال 4 ادامدى قازىر اۋرۋحانادان شىعارۋ كەرەك.

«تاعى قانشا ادام شىعادى؟» دەگەن ءجۋرناليستىڭ سۇراعىنا «ونىمەن اينالىسىپ جاتىرمىز، قاراپ جاتىرمىز» دەپ جاۋاپ بەردى ول.

«ولاردىڭ جاتاتىن ورىندارىنا بارمايمىز عوي. ولاردى ادۆوكاتتاردىڭ، تەرگەۋشىلەردىڭ كەزدەسەتىن جەرىنە الىپ شىعادى. ءبىز جۇمىستى كەشە عانا باستادىق. سەنبى كۇنى عانا رۇقسات بەرىلدى. بۇل باستامامىزدى پرەزيدەنت اكىمشىلىگى قولدايتىنىن ءبىلدىرىپ، پروكۋراتۋرا ورگاندارىمەن بىرگە جۇمىس ىستەۋگە تاپسىرما بەردى. كەشەدەن باستاپ ارنايى ماماندارمەن ماتەريالداردى ەندى-ەندى قاراپ باستادىق.

11 ادام تەك قانا قىلمىستىق ءىس بويىنشا بوساتىلدى. ولار 272 باپپەن ۇستالعان ەدى.

مىسالىعا مىنا باۋىرىمىزدىڭ ەشقانداي كىناسى جوق، كۇزەت باسقارماسىندا قىزمەتتە ىستەيدى. ولار كەرىسىنشە بەلسەندى بولادى»، — دەدى ول جەلىدە تاراعان ۆيدەودا.

              "ادىرنا" ۇلتتىق پورتالى

پىكىرلەر