"ناعىز ايەل" ۇعىمىن ءاربىر ايەل زاتى وزىنشە تۇسىنەدى. دەگەنمەن، ءبارىنىڭ دە وتباسىندا سۇيىكتى كەلىن، جاقسى جار، اياۋلى انا بولۋعا ۇمتىلارى انىق. ادام ءبىر دۇنيەنى وزگەرتكىسى كەلسە، اۋەلى وزىنەن باستاعانى دۇرىس. سول سەكىلدى ءوزىڭىزدىڭ قانداي ايەل ەكەنىڭىزدى ءوزىڭىز عانا جاقسى بىلەسىز.
1.ناعىز ايەل وتباسىن باستى ورىنعا قويادى. ول وتباسىنداعى بارلىق جاننىڭ سۇيىكتىسى، بالالارىنىڭ ماقتانىشى، اياۋلىسى، قامقورشىسى. ونىڭ وتىرعان جەرى كوڭىلدى. ۇيىندە داۋ-دامايعا جول بەرمەيدى جانە ىنتىماق پەن بىرلىكتى بالالارىنا ۇنەمى دارىپتەپ وتىرادى.
2. ناعىز ايەل بارلىق ءىستى اقىلىمەن شەشەدى. وتباسىنا، كۇيەۋىنە، بالالارىنا كەرى اسەر ەتەر ىستەردەن اۋلاق جۇرەدى. ادام نامىسىن اياق استى ەتپەيدى.
3. ناعىز ايەل قاڭقۋ سوزدەردى ايتپايدى. ول وتىرىك-وسەكتەن اۋلىق. وزگەنى تىلدەۋ، مۇقاتۋ، كەمسىتۋ ونىڭ ءىسى ەمەس.
4. ناعىز ايەل وتباسىنداعى كەمشىلىكتەردى سىرتقا شىعارمايدى. ەرىنىڭ، ەنەسىنىڭ مىنەزدەرىندەگى كەمشىلىكتەردى جانە باسقا دا جايلاردى جۇرتقا جاريا ەتپەيدى. بالالارىنا ادام بالاسىن جاماندامايدى.
5. ناعىز ايەل اۋزىنان شىعار سوزىنە اباي بولادى. جيىركەنىشتى، بىلاپىت سوزدەر ايتپايدى جانە ەشكىممەن دە بەت جىرتىسىپ ۇرىسپايدى. ءوزىنىڭ ورنىن، سويلەر ءسوزىن بىلەدى. قانداي دا ءبىر قاتەلىك جىبەرسە، كەشىرىم سۇراۋدى كەشىكتىرمەيدى.
6. ناعىز ايەل وتباسىنىڭ بەرەكەسى. ول ءۇشىن وتباسى تىنىشتىعى، باقىتى ماڭىزدى. ءوز ءۇيىن تازا ۇستاپ، تاماقتىڭ ءتۇر-ءتۇرىن ازىرلەي الادى. قوناق شاقىرعاندى ۇناتادى.
7. ناعىز ايەل بىلىمگە، بىلۋگە قۇشتار. ول ءوزىن ۇنەمى جان-جاقتى جەتىلدىرىپ وتىرۋعا تىرىسادى. بالالارىنىڭ بويىنا دا وسى قاسيەتتى سىڭدىرەدى. ول ءۇشىن بالا تاربيەسى ەڭ جاۋاپتى ءىس.
8. ناعىز ايەل وزىمەن جۇمىس جاساي الادى. كەز كەلگەن جاعدايدا ءوزىن دۇرىس ۇستاي الادى جانە ءوزىن باسقارۋدى ۇيرەنگەن. ول ءۇشىن تاكاپپارلىق، وركوكىرەكتىك، مەنمەندىك جات قىلىق. اينالاسىنداعى ادامداردى ءبىرى-بىرىنەن ءبولىپ-جارىپ قارامايدى.
9. ناعىز ايەل ەرىنىڭ باستاعان ءاربىر ءىسىن قولدايدى. ونىڭ جاقسى قاسيەتتەرىنە كوزىن اشىپ قارايدى. كۇيزەلگەن، شارشاپ-شالدىققان ساتىندە جانىنان تابىلىپ، ۇنەمى جىلى سوزدەرىمەن دەم بەرىپ وتىرادى.
10. ناعىز ايەل ءوزىن جانە وزگەلەردى سۇيە الادى. ول باسقالاردىڭ ويىن، اقىل-كەڭەسىن تىڭداي الادى جانە وزىنە كۇتىممەن قاراعاندى قۇپ كورەدى. ءوزىنىڭ ايەل زاتىنا ءتان نازىكتىگى مەن سەزىمتالدىعىن، ەركە قىلىعىن ۇمىتقان ەمەس. "ناعىز ايەل" دەگەن تەڭەۋگە سىيار ۇعىم كوپ. ال، "ناعىز ايەل" بولۋ تۇك تە قيىن ەمەس، ونى قيىنداتاتىن − ءوزىمىز!
massaget.kz
