ىشكى ىستەر مينيسترلىگى قاڭتارداعى تارتىپسىزدىكتەرگە قاتىستى دەگەن كۇدىكپەن قاماۋدا وتىرعان الماتىلىق مۇعالىم وركەن ەرزاتتىڭ تۋىستارىنىڭ ارىزىن قاراپ جاتىر. بۇل تۋرالى “ادىرنا” ۇلتتىق پورتاوى Almaty.tv ارناسىنا سىلتەمە جاساپ حابارلايدى.
ارنا مالىمەتىنشە، كوللەدجدىڭ 22 جاستاعى وقىتۋشىسى 11 كۇننەن بەرى ۋۇي-دا جاتىر. ەر ادام تارتىپسىزدىكتەرگە قاتىستى دەگەن كۇدىككە ىلىنگەن. الايدا جىگىتتىڭ تۋىستارىنىڭ ايتۋىنشا، ونى قاتەلەسىپ ۇستاعان.
"مەن ونىڭ ميتينگىگە قاتىسقانىنا سەنبەيمىن، ونى جاقسى بىلەمىن. ونىڭ تابيعاتىندا مۇنداي جوق. ول وتە تىنىش جانە تۇيىق، اقكوڭىل ادام. ونى امان-ەسەن قايتارۋىن تالاپ ەتەمىن", - دەپ جىلايدى وقىتۋشىنىڭ اناسى كۇلماريا نۇراحىمبەك.
5 قاڭتاردا وركەن تۋىستارىنا بارۋدى جوسپارلاعان. بىراق اۆتوبۋستار جۇرمەي، كولىكتەر بولماعان. ينتەرنەت جۇمىس ىستەمەي، ال اقشاسى تەك ءمابيلدى قوسىمشادا بولعان. ەر ادام وزىنە قاۋىپ توندىرە وتىرىپ، بانكوماتتى پايدالانۋدى ۇيعارعان، بىراق سول كەزدە اياعىنان وق جاراقاتىن العان، دەيدى ەر ادامنىڭ تۋىستارى.
جارالانعان وركەن اۋرۋحاناعا جەتكىزىلىپ، وتا جاسالعان. ونى تۋىستارى اۋرۋحانادان الىپ كەتكەن. كوپ ۇزاماي ارتىنان پوليتسيا كەلگەن.
"13-ءى كۇنى پوليتسيا كەلدى، ءىنىمدى الىپ كەتتى، ءبىر-ەكى ساعات دەدى، بىراق قازىر 11 كۇن ءوتتى. جاعدايى تۋرالى اقپارات جوق، قاتتى ۋايىمداپ وتىرمىز. انام ۇنەمى جىلايدى. 25-ءى كۇنى ادۆوكاتپەن بارىپ، ىنىممەن كەزدەسۋىمىز كەرەك. بايعۇس ءىنىمدى ۇرىپ-سوعىپ جاتقانىنا سەنىمدىمىن", - دەيدى ەر ادامنىڭ اپكەسى ارداق ەرزات.
قازىر بۇل ءىس قالالىق پروكۋراتۋرا باقىلاۋىندا. ال، ىشكى ىستەر مينيسترلىگى مۇنداي ءاربىر ءىس جەكە قارالاتىنىن مالىمدەدى. ءتارتىپ ساقشىلارىنىڭ كىناسى دالەلدەنسە، قىلمىستىق جاۋاپكەرشىلىككە تارتىلاتىنى ايتىلدى.
"ىشكى ىستەر مينيسترلىگى ازاماتتارعا قاتىستى كۇش قولدانۋ دەرەكتەرىنە قاتاڭ ارەكەت ەتەدى. ءاربىر فاكت پوليتسيا عيماراتتارى مەن قوعامدىق ورىنداردا ورناتىلعان بەينەكامەرالاردى تالداۋ ارقىلى مۇقيات زەردەلەنەدى", - دەدى ۆەدومستۆونىڭ رەسمي وكىلى ءنۇردىلدا وراز.
“ادىرنا” ۇلتتىق پورتالى
