قىزىلوردادا بەلسەندى كوپبالالى انا قاماۋعا الىنعان

1828
قىزىلوردا وبلىسىندا كوپبالالى انالار مەن مۇگەدەك بالالار ماسەلەسىن كوتەرىپ جۇرگەن بەلسەندىنى ەكى ايعا سوتقا دەيىن قاماۋعا العان دەپ حابارلايدى "ادىرنا" ۇلتتىق پورتالى.
زارينا بيباساروۆانىڭ كۇيەۋى نۇرلان ماتەنوۆ ول تۋرالى بىلاي دەيدى:
"مەن قىزىلوردا قالاسىنىڭ تۇرعىنىمىن. ايەلىمدى 4, 5 قاڭتار كۇنى ميتينگىگە شىقتى دەپ، 2 اي سوتقا دەيىن قاماۋعا الدى. 7 بالامىز بار. 6-بالام (5 جاسار) جۇرەگى اۋىرادى، مۇگەدەكتىگى بار. كىشكەنتايىم 7 ايلىق ەمشەك ەمەدى. وبلىستىق سوت ەمشەگىنەن ءسۇت اعىپ تۇرعانىنا قاراماي، ايەلىمدى 7 بالاسىنان ايىرىپ، قاماپ وتىر".
ال ول تۋرالى بەلسەندى جاميلا قاسىمحان ءوز پاراقشاسىندا بىلاي دەپ جازدى:
"اكىم ورىنباسارى ىستىقباەۆ تالعات "كەل، اقىلداساتىن شارۋا بار دەپ", 5 قاڭتار كۇنى زارينا بيباساروۆانى اكىمدىككە شاقىرعان. زارينا بيباساروۆا كوپبالالى انالار مەن مۇگەدەك بالالار ماسەلەسىن كوتەرىپ جۇرگەن قالالىق بەلسەندى. اكىمشىلىككە كەلگەن كەزىندە ونى قاراۋىل اكىمشىلىك عيماراتىنا وتكىزبەيدى. زارينا ءوزىن شاقىرعانىن ايتىپ كىرگىزۋدى تالاپ ەتەدى. سولاي تۇرعاندا ميتينگىشىلەر كەلىپ، قاقپانى كۇشتەپ اشىپ كىرەدى.
زارينا سودان كەيىن قايتىپ كەتەدى. كەتىپ بارا جاتىپ ىستىقباەۆ تالعاتقا تارتىپسىزدىك تۋرالى تەلەفونمەن حابارلاسىپ، شارا قولدانۋ كەرەك ەكەنىن ايتادى. تالعات كەلىسەدى.
8 قاڭتار كۇنى كەشكە ۋچاسكەلىك پوليتسەي، وپەر قىزمەتكەرلەرمەن بىرگە زارينانى ۇيىنەن الىپ كەتەدى. تۇندە 5 ساعات تەرگەۋ جۇرگىزەدى. كۇيەۋىنىڭ ايتۋىنشا، تەرگەۋشىسى رايىمبەك دەگەن جاس بالا. تەرگەۋدەن كەيىن بوساتىپ جىبەرەدى. ەرتەڭىنە 9 قاڭتار كۇنى شاقىرىپ الىپ، پروتوكولمەن تانىستىرىپ تەرگەۋ الدى 2 ايعا قاماققا الادى. ەمشەگى سىزداپ، ءسۇتى اعىپ تۇرعانىنا سوت پەن پروكۋرور قارامايدى. ونىڭ ۇستىنە زارينا قانت ديابەتىمەن ەسەپتە تۇرادى. قانت مولشەرى 23-25 بولىپ كوبەيىپ كەتكەن. ۇلكەن قىزى دا ۆاسكۋليت دەگەن دياگنوز قويىلعان، ەسەپتە تۇرادى. وسىنىڭ ءبارىن سوت ەسكەرمەگەن.
وبلىستىق سوت القاسىنا كۇيەۋى ادۆوكات كومەگىمەن شاعىمدانعان. شاعىمى قاناعاتتاندىرىلماعان".
بۇدان كەيىن كوپبالاى اناعا 2022 جىلعى  19 قاڭتاردا قىزىلوردا قالاسىندا قىزىلوردا وبلىستىق سوتى قاۋلى شىعارعان. قىزىلوردا وبلىستىق سوتىنىڭ قىلمىستىق ىستەر جونىندەگى سوت القاسىنىڭ سۋدياسى س.ابديكانوۆتىڭ توراعالىق ەتۋىمەن، حاتشى گ.ناريكباەۆا بولىپ، پروكۋرور ا.ەسنيازوۆتىڭ، ادۆوكات گ.ابديەۆانىڭ قاتىسۋلارىمەن، بەينە بايلانىس جۇيەسى ارقىلى ءوزىنىڭ جابىق سوت وتىرىسىندا قىزىلوردا قالاسىنىڭ مامانداندىرىلعان تەرگەۋ سوتىنىڭ 2022 جىلعى 12 قاڭتارداعى كۇدىكتى P.C.بيباساروۆاعا قاتىستى "كۇزەتپەن ۇستاۋ" تۇرىندەگى بۇلتارتپاۋ شاراسىن سانكتسيالاۋ تۋرالى قاۋلىسىنا ادۆوكات گ.ابديەۆانىڭ كەلتىرگەن جەكەشە شاعىمىن قاراپ، انىقتالعان.
وسىلايشا سوت "كۇزەتپەن ۇستاۋ" تۇرىندەگى بۇلتارتپاۋ شاراسىن 2 (ەكى) اي مەرزىمگە، ياعني،  2022 جىلدىڭ قاڭتار ايىنىڭ 10 كۇنى 16 cاعات 56 مينۋتىنان باستاپ ناۋرىز ايىنىڭ 10 كۇنى 16 cاعات 56 مينۋتىنا دەيىن بەرگەن.

"ادىرنا" ۇلتتىق پورتالى.

پىكىرلەر
رەداكتسيا تاڭداۋى
Серіктестер/Партнеры
Студия IMA - создание сайтов Доставка цветов Астана - Lova Buket