تۇركىستان وبلىسىندا شەنەۋنىك ءجۋرناليستى ولتىرۋگە تاپسىرىس بەرگەن. ول بۇل قىزمەت ءۇشىن 5 ملن تەڭگە تولەگەن، دەپ حابارلايدى «ادىرنا» ءتىلشىسى.
3 قاڭتاردا الەۋمەتتىك جەلىلەر مەن باق-تا سارىاعاش اۋدانىنداعى بەلگىلى ءجۋرناليستىڭ ۇيىنە شابۋىل جاسالىپ، ونىڭ بالاسى جاراقات العانى تۋرالى اقپارات تاراعان بولاتىن.
سول كۇنى پوليتسيا قىزمەتكەرلەرى بۇل جايتتى اۋداندىق پوليتسيا بولىمىندە تىركەپ، قر قك 24-99-باپتارى "ادام ولتىرۋگە وقتالۋ" بويىنشا سوتقا دەيىنگى تەرگەۋدى باستادى. وبلىستىق پوليتسيانىڭ ۇزدىك جەدەل ۋاكىلدەرى مەن تەرگەۋشىلەرى اۋىر قىلمىستى اشۋعا باعىتتالدى. بۇل تۋرالى تۇركىستان وبلىسى پد باستىعى پوليتسيا گەنەرال-مايورى قايرات دالبەكوۆ ەگجەي-تەگجەيلى ايتىپ بەردى.
«جاسالعان قىلمىس تۋرالى اقپاراتتى العان سوڭ، بىردەن سارىاعاش اۋدانىنداعى قىلمىس ورنىنا مەنىڭ جەدەل قىزمەت جونىندەگى ورىنباسارىم قۇرمانبەك ساحوۆ باستاعان كريمينالدىق پوليتسيانىڭ كاسىبي قىزمەتكەرلەرى مەن تەرگەۋشىلەر توبى جىبەرىلدى. ولار كەلگەن بويدا بەلگىسىز بىرەۋلەردىڭ ءجۋرناليستىڭ ۇيىنە اۆتوكولىكپەن بارىپ، تەرەزەدەن وق اتىپ، قاشىپ كەتكەندەرىن انىقتادى. ناتيجەسىندە ءۇي يەسىنىڭ ۇلى جاراقات العان. بۇل قىلمىستى ءىزىن سۋىتپاي اشۋدا وقيعا ورىن العان ۋاقىتتا كۋالاردىڭ بولماۋى دا وزىندىك قيىندىق تۋعىزدى.
دەسە دە، جەدەل-ىزدەستىرۋ ءىس-شارالارىن جۇرگىزۋ بارىسىندا وسى وقيعاعا قاتىسى بار شىمكەنت قالاسىنىڭ ەكى جاس تۇرعىنى تۇرعىلىقتى جەرى بويىنشا ۇستالدى. ولار وق اتىپ، وقيعا ورنىنان قاشىپ كەتكەن. سودان كەيىن پوليتسيا قىزمەتكەرلەرىمىز دەلدالدار مەن قىلمىستى تاپسىرىس بەرۋشىلەرگە شىقتى. بۇگىنگى تاڭدا ءبىز وسى قىلمىسقا قاتىسى بار 5 كۇدىكتىنى ۇستادىق. زاتتاي ايعاق رەتىندە ولاردان ۆاز (2107/21110) ماركالى 2 اۆتوكولىك تاركىلەندى. قىلمىستى ورىنداۋشىلار بۇل اۆتوكولىكتەردى قىلمىستى جاساعاندارى ءۇشىن العان اقشاعا ساتىپ العان. سونداي-اق ولاردان 16 كاليبرلى پاتروندار الىندى»،– دەدى ول.
قازىرگى ۋاقىتتا سارىاعاش اۋدانى تۇرعىندارىنىڭ ءبىرى، ياعني شەنەۋنىكتىڭ وسى قىلمىسقا تاپسىرىس بەرگەنى انىقتالدى. ول ءجۋرناليستىڭ ءومىرىن 5 000 000 تەڭگەگە باعالاعان.
«ءوز كەزەگىندە ورىنداۋشىلار ىزدەرىن جاسىرۋ ماقساتىندا تاپسىرىستى ورىنداپ، سارىاعاش اۋدانىنان شارداراعا، سودان سوڭ ارىس ارقىلى شىمكەنتكە جەتكەن. قازىر تەرگەۋ توبى ءتيىستى تەرگەۋ امالدارىن جۇرگىزۋدە. وسى قىلمىستىق ءىس اياسىندا قاجەتتى پروتسەسسۋالدىق ارەكەتتەر ىسكە اسىرىلۋدا. سوتقا دەيىنگى تەرگەۋ بارىسىندا قىلمىستىڭ سەبەپتەرى مەن بارلىق ءمان-جايلارى انىقتالاتىن بولادى. سوت ولاردى قاماۋعا الۋعا سانكتسيا بەرىپ، كۇدىكتىلەر ۋاقىتشا ۇستاۋ يزولياتورىنا قامالدى»،- دەپ قورىتىندىلادى دەپارتامەنت باستىعى ق.دالبەكوۆ.
«ادىرنا» ۇلتتىق پورتالى
