شىمكەنت قالاسىنىڭ اكىمى مۇرات ايتەنوۆ قاراتوبە (بازارقاقپا، ابدۋلاباد، بادام-1, تۇردىاباد، شاڭىراق) اۋماعىنىڭ ينفراقۇرىلىم جۇيەلەرىمەن تانىسىپ، ە.يۋسۋپوۆ اتىنداعى №104 مەكتەپتە تۇرعىندارمەن كەزدەستى.
ەڭبەكشى اۋدانى اۋماعىندا ينفراقۇرىلىم جۇيەلەرىن دامىتۋ بويىنشا 2021-2025 جىلدارعا ارنالعان «جول كارتاسى» ناقتىلانىپ، بەكىتىلگەن. بۇگىندە قاراتوبە اۋماعىنداعى ەلدى مەكەندەر اۋىز سۋ، تابيعي گازبەن تولىق قامتىلعان. 104,6 شاقىرىم اۆتوموبيل جولدارىنىڭ 61,3 شاقىرىمى اسفالتتالعان.
بازارقاقپا، ابدۋلاباد، بادام-1 تۇرعىن الاپتارىنا اۋىز سۋ جۇيەسى تولىعىمەن جاڭارتىلىپ، قازىرگى تاڭدا تۇرعىندارعا تاۋلىك بويى اۋىز سۋ بەرىلۋدە. بازارقاقپا، بادام-1 تۇرعىن الاپتارىندا جەكەمەنشىك جۇيەدەگى 998 ابونەنتكە بيۋدجەت ەسەبىنەن ەلەكتر جەلىلەرى جۇرگىزىلسە، «وڭتۇستىك جارىق ترانزيت» جشس-ءى ەسەبىنەن 901 ابونەنتتىڭ ەلەكتر جەلىلەرى جاڭارتىلدى.
وتكەن جىلى 4 سپورت الاڭشاسى (تۇردىاباد، بادام-1) سالىنىپ، تۇرعىندار يگىلىگىنە بەرىلدى. بازارقاقپا تۇرعىن الابىندا 6 كوشەگە، ابدۋلاباد تۇرعىن الابىندا 2 كوشەگە اسفالت جول سالىندى. ابدۋلاباد ەلدى مەكەنىنىڭ ىشكى كوشەلەرىندەگى توپىراق جولعا شاعال تاس توسەۋ جۇمىستارى جۇرگىزىلدى.
بيىل قاراتوبە اۋماعىنداعى كوشەلەرگە بيۋدجەت ەسەبىنەن اسفالت توسەۋ جۇمىستارى اتقارىلادى. بادام-1 تۇرعىن الابىندا 153, ابدۋلاباد تۇرعىن الابىندا 484 جەكەمەنشىك ەلەكتر جەلىلەرىن اۋىستىرۋ جۇمىستارى قولعا الىنادى. تۇردىاباد تۇرعىن الابىندا 1 بالالار ويىن الاڭشاسى سالىنادى. اۋماقتاعى 24 كوشەگە ورتاشا جوندەۋ جۇمىستارى جۇرگىزىلەتىن بولادى.
قالا اكىمى اتالعان جۇمىستاردىڭ بارلىعى تۇرعىنداردىڭ يگىلىگى ءۇشىن قولعا الىنعانىن اتاپ ءوتتى. سمەتالىق قۇجاتتارعا سايكەس جول توسەۋ جۇمىستارىن قاتاڭ باقىلاۋعا الۋ جانە كەزدەسۋدە ايتىلعان تۇرعىنداردىڭ ءوتىنىشى نەگىزىندە جەر ماسەلەسىن شەشۋ جونىندە ءتيىستى سالا باسشىلارىنا ناقتى تاپسىرمالار بەردى.
شىمكەنت قالاسى اكىمدىگىنىڭ ءباسپاسوز قىزمەتى
