Shymkent qalasynyń ákimi Murat Áıtenov Qaratóbe (Bazarqaqpa, Abdýlabad, Badam-1, Turdyabad, Shańyraq) aýmaǵynyń ınfraqurylym júıelerimen tanysyp, E.Iýsýpov atyndaǵy №104 mektepte turǵyndarmen kezdesti.
Eńbekshi aýdany aýmaǵynda ınfraqurylym júıelerin damytý boıynsha 2021-2025 jyldarǵa arnalǵan «Jol kartasy» naqtylanyp, bekitilgen. Búginde Qaratóbe aýmaǵyndaǵy eldi mekender aýyz sý, tabıǵı gazben tolyq qamtylǵan. 104,6 shaqyrym avtomobıl joldarynyń 61,3 shaqyrymy asfalttalǵan.
Bazarqaqpa, Abdýlabad, Badam-1 turǵyn alaptaryna aýyz sý júıesi tolyǵymen jańartylyp, qazirgi tańda turǵyndarǵa táýlik boıy aýyz sý berilýde. Bazarqaqpa, Badam-1 turǵyn alaptarynda jekemenshik júıedegi 998 abonentke bıýdjet esebinen elektr jelileri júrgizilse, «Ońtústik Jaryq Tranzıt» JShS-i esebinen 901 abonenttiń elektr jelileri jańartyldy.
Ótken jyly 4 sport alańshasy (Turdyabad, Badam-1) salynyp, turǵyndar ıgiligine berildi. Bazarqaqpa turǵyn alabynda 6 kóshege, Abdýlabad turǵyn alabynda 2 kóshege asfalt jol salyndy. Abdýlabad eldi mekeniniń ishki kóshelerindegi topyraq jolǵa shaǵal tas tóseý jumystary júrgizildi.
Bıyl Qaratóbe aýmaǵyndaǵy kóshelerge bıýdjet esebinen asfalt tóseý jumystary atqarylady. Badam-1 turǵyn alabynda 153, Abdýlabad turǵyn alabynda 484 jekemenshik elektr jelilerin aýystyrý jumystary qolǵa alynady. Turdyabad turǵyn alabynda 1 balalar oıyn alańshasy salynady. Aýmaqtaǵy 24 kóshege ortasha jóndeý jumystary júrgiziletin bolady.
Qala ákimi atalǵan jumystardyń barlyǵy turǵyndardyń ıgiligi úshin qolǵa alynǵanyn atap ótti. Smetalyq qujattarǵa sáıkes jol tóseý jumystaryn qatań baqylaýǵa alý jáne kezdesýde aıtylǵan turǵyndardyń ótinishi negizinde jer máselesin sheshý jóninde tıisti sala basshylaryna naqty tapsyrmalar berdi.
Shymkent qalasy ákimdiginiń baspasóz qyzmeti
