ناۋرىز – ىزگىلىك پەن يگىلىكتىڭ مەرەكەسى

2290
Adyrna.kz Telegram

شۋاقتى كوكتەمنىڭ كەلگەنىن بىلدىرەتىن ناۋرىز – حالقىمىز ءۇشىن مەرەكەلى ءھام بەرەكەلى اي. قىستان شىعىپ، كوڭىلى كولدەي شالقىعان كوشپەلى جۇرتتىڭ تۇرمىسىندا ەرەكشە ورىن العان ۇلتتىق مەيرامىمىز وسى ايدىڭ ەنشىسىندە.

ۇلىستىڭ ۇلى كۇنىندە جاسالاتىن ۇلتتىق ادەت-عۇرىپتاردىڭ ۇرپاققا بەرەر تاربيەسى مەن تاعىلىمى مول. اسىل دىنىمىزبەن ۇيلەسكەن ۇلتتىق مەرەكەمىز ادامزات بالاسىن باۋىرمالدىق پەن تاتۋلىققا، مەيىرباندىق پەن دوستىققا ۇندەيدى.

جاس­­قا جاقسىلىق تىلەۋ – جاسا­مىس­تىڭ مىزعىماس مىندەتى. ۇمبەتەي جىراۋ: «اق­­ساقالعا جاراسار، تىلەۋقورلىق اي­­لاسى»، – دەپ جىرلايدى. مەرەيلى مەرەكە كۇندەرى ابىز اقساقال مەن باتاگوي قاريانىڭ: «كو­­سەگەڭ كوگەرسىن»، «جاسىڭ ۇزاق بول­سىن»، «قا­تا­رىڭ­نىڭ الدى بول»، – دە­­گەن باتا-تىلەگىن العان بالا «ۇيادا نە كورسە، ۇشقاندا سونى ىلەتىن» بولادى. بالاعا باتا بەرۋ، ول ءۇشىن جاراتقاننان جارىلقاۋ تىلەۋ – پايعامبارلار زامانىنان بەرى كەلە جاتقان ساۋابى مول سۇننەت امال.

اق سامايلى دۇعاگوي اجەلەردىڭ ءتۇرلى ءدان-داقىلدان جاساعان ناۋرىز كوجەسى – مەرەكەنىڭ ءمانىن كەلتىرەتىن نىشان. شىن كوڭىل، شىنايى نيەتپەن جاسالعان اس ادامدار اراسىندا مەيىرىمدىلىك پەن كەشىرىمدىلىك سىندى اسىل قاسيەتتەردى قالىپتاستىرادى. ساداقانىڭ ابزالى – حالىققا اس بەرۋ.

كوكپار تارتىپ، جامبى اتۋ، ات شاپتىرىپ، بالۋان كۇرەستىرۋ – ناۋرىز مەرەكەسىنىڭ ءسانىن ارتتىراتىن يگى شارالار. پايعامبارىمىز مۇحاممەد (وعان اللانىڭ سالاۋاتى مەن سالەمى بولسىن) بالانى اتقا مىنگىزىپ، ساداق اتۋعا، سۋدا ءجۇزۋدى ۇيرەتىپ، كۇرەستىرۋدى وسيەت ەتكەن. وسكەلەڭ ۇرپاقتى باتىرلىق پەن باتىلدىققا تاربيەلەيتىن ۇلتتىق سپورتتىق ويىندارىمىز اللا ەلشىسىنىڭ سۇننەتىمەن ۇندەسىپ، كوركەم ۇيلەسىم تاپقان.

ءبىز «ءبىر تال كەسسەڭ، ون تال ەك» دەگەن ماقالدى تىرشىلىكتىڭ قاعيداسىنا اينالدىرعان حالىقپىز. ۇلكەننەن ۇلگى بولىپ، ۇرپاققا جالعاسقان ونەگەلى ومىرلىك داعدىلارىمىزدىڭ ءبىرى – اتا مەن بالانىڭ اعاش وتىرعىزۋى. ناۋرىزدا كورىنىس تاباتىن وسىناۋ يگى امالدىڭ ءمانى ەرەكشە. «قيامەت بولارىن ءبىلىپ تۇرساڭ دا قولىڭداعى ءبىر ءتۇپ اعاشتى وتىرعىزىپ قال», – دەگەن ءحاديستىڭ تاربيەلىك ماعىناسى تەرەڭدە جاتىر.

ناۋرىز مەرەكەسىندە كورشى-قولاڭ، قۇدا-جەكجات، اعايىن-تۋىستى ارالاپ، امان-ساۋلىق سۇراسىپ، مارە-سارە كۇي كەشەمىز. ەر كىسىلەر ءتوس قاعىستىرىپ، ءبىر-بىرىمىزگە ىزگى تىلەكتەرىمىزدى ايتامىز. رەنجىسكەندەر تاتۋلاسىپ، كەشىرىم جولىن ۇستانادى. تۋىسقاندى زيارات ەتۋ، كەشىرىم جاساپ، مەيىرباندىق تانىتۋ – پايعامبار سۇننەتىنەن. «كورشى اقىسى – ءتاڭىر اقىسى»، «ارالاسپاسا اعايىن جات»، – دەگەن ناقىل بار. قاسيەتتى قۇران مەن حاديس اعايىنعا قارايلاسىپ، كورشىنىڭ اقىسىن بەرۋدى، كەشىرىم جاساۋدى تالاپ ەتەدى.

ناۋرىز – قايىرىمدىلىقتىڭ مەرەكەسى. بۇل كۇندەرى حالقىمىز جەتىم مەن جەسىردى جابىرقاپ، كەمباعال مەن مۇگەدەككە قايىرىمدىلىق كورسەتكەن. جۇتقا ۇشىراعان جاندارعا جۇمىلىپ، جىلۋ جيناپ بەرگەن.

بۇگىندە ەلىمىزدىڭ شىعىس ايماعىندا سۋ تاسقىنىنان ءۇيسىز-كۇيسىز قالعان باۋىرلارىمىزعا بارىنشا قولداۋ كورسەتىپ، اتا-بابا داستۇرىنەن جاڭىلماي، مۇسىلماندىق ءارى ازاماتتىق مىندەتىن اتقارىپ جاتقان اعايىنعا اللا رازى بولسىن دەگىم كەلەدى. وسىناۋ ورتاق ساۋاپتى ىستە ءدىن قىزمەتكەرلەرى دە بەلسەندىلىك تانىتۋدا.

قادىرلى باۋىرلار!

بارشاڭىزدى ۇلتىمىزدىڭ ۇلىق مەيرامى – ناۋرىز مەرەكەسىمەن قۇتتىقتايمىن! كۇللى تۇركى جۇرتىنىڭ ءتول تويى – ءاز ناۋرىز ەلىمىزدەگى ءتۇرلى ۇلتتى ۇيىمشىلدىققا ۇيىستىرىپ، كەشىرىم مەن مەيىرىمنىڭ مەرەكەسىنە اينالىپ كەلەدى.

دوستىق پەن تاتۋلىقتىڭ، باۋىرمالدىقتىڭ، يگىلىك ءھام بىرلىكتىڭ، ىزگىلىك پەن ىزەتتىلىكتىڭ مەيرامى قۇتتى بولسىن! ۇلىس وڭ بولسىن، اق مول بولسىن!

اللا تاعالا حالقىمىزعا ارقاشان اماندىق، جۇرتىمىزعا تىنىشتىق ءناسىپ ەتكەي! تاۋەلسىزدىگىمىز باياندى بولعاي!

بارشاڭىزعا جاراتقاننىڭ ءوزى جار بولعاي! ءامين!


سەرىكباي قاجى وراز،

قازاقستان مۇسىلماندارى ءدىني

باسقارماسىنىڭ توراعاسى، باس ءمۇفتي  

Abai.kz

پىكىرلەر