قازاقستاننىڭ بۇرىنعى پرەزيدەنتى نۇرسۇلتان ابىشۇلىمەن قوسا جۇرت ونىڭ تۋعان-تۋىستارىن دا ىزدەپ جاتىر. تۇڭعىش پرەزيدەنتتىڭ باۋىرى بولات نازارباەۆتىڭ شەتەل اسىپ كەتكەنى ءسوز بولدى. Nege.kz ءتىلشىسى بولات ءابىشۇلىنىڭ الماتى ىرگەسىندەگى «رەزيدەنتسياسىنا» بارىپ قايتتى.
ۇشقوڭىرعا بارار جول بويىندا ەلدەن ەرەكشەلەپ سالىنعان قورعان بايقالادى. «ءۇي» دەپ ايتپاي وتىرعانىمىز قورعان بيىكتىگىنەن ارعى بەتتە نە بارىن كورۋ مۇمكىن ەمەس. جەرگىلىكتى تۇرعىنداردىڭ ايتۋىنا قاراعاندا، بۇل اۋماقتا بولات نازارباەۆتىڭ ءۇيى ورنالاسقان.
ساپارىمىزدىڭ نەگىزگى ماقساتى ب.نازارباەۆتىڭ قايدا ەكەنىن انىقتاۋ جانە ءۇي ماڭىندا كەلىمدى-كەتىمدى ادام بولسا، اڭگىمەگە تارتىپ ءمان-جايدى سۇراۋ ەدى. بىزبەن قاتار بۇل جەرگە orda.kz رەداكتسياسىنداعى ارىپتەستەرىمىز دە كەلگەن ەكەن. ولار درون ۇشىرىپ، اۋلا ىشىنەن قانداي دا ءبىر اقپارات الۋعا تىرىستى.
سول ءساتتۋ جانىمىزعا مەملەكەتتىك تىركەۋ ءنومىرى 767 AY|05 KIA اۆتوكولىگى توقتاپ، باقىلىپ تۇردى.
كوپ وتپەي اۋەدەگى درونعا اتىلعان بىرنەشە وق داۋسى ەستىلدى. ارتىنشا اۆتومات اسىنعان كۇزەتشىسى بىزگە قاراي جۇگىرىپ كەلدى. بىزدىڭ كىم ەكەنىمىزدى، نە ءۇشىن تاسپاعا ءتۇسىرىپ جاتقانىمىزدى انىقتاماق بولدى. «كىمنىڭ ءۇيىن كۇزەتەسىز؟» دەگەن ءبىزدىڭ قارسى ساۋالىمىزدى ەستىمەگەندەي بولدى.
– نە ىستەپ جۇرسىڭدەر؟
– جۇمىسپەن ءجۇرمىز.
– درون كىمدىكى، سەندەردىكى ما؟
– تىنىشتىق پا؟
– ءۇيدىڭ ىشىنە كىرىپ كەتتى...
– ءۇيدىڭ ىشىنە قالاي كىرەدى، ەسىك-تەرەزەسى اشىق ەمەس شىعار؟!
– ءۇيدىڭ ىشىنە كىرىپ كەتتى.
– مىناۋ «بولات نازارباەۆتىڭ ءۇيى» دەگەن راس پا؟
– ول كىم؟ تانىمايمىن مەن... سەندەر كىمسىڭدەر؟
– ءبىز – جۋرناليست. ال، ءسىز كىمسىز؟ نەگە كوشەدە قارۋ اسىنىپ جۇرسىز؟
– بەيبىت كۇن ەمەس، وسى جەردە ءجۇرمىن.
– نە ءۇشىن ءجۇرسىز؟
– ...
P.S: بولات نازارباەۆتىڭ ءۇيىن كۇزەتەتىن قارۋ اسىنعان كۇزەتشى وسىلايشا درونعا وق اتىپ، جۋرناليستەرگە دوق كورسەتتى. كيگەن كيىمىندە قانداي دا ءبىر اسكەردىڭ نەمەسە پوليتسيانىڭ ارنايى بەلگىلەرى جوق. ياعني بۇل ءۇيدى جەكە ادامدار كۇزەتىپ جۇرسە كەرەك. ال «بولات نازارباەۆ قايدا؟» دەگەن سۇراققا سول كۇيى جاۋاپ تابىلمادى.
“ادىرنا” ۇلتتىق پورتالى
