2018 جىلعى 15 ناۋرىزدا قازاقستان رەسپۋبليكاسى ۇلتتىق مۋزەيىندە «قوش كەلدىڭ، ناۋرىز، مول بولسىن ءدام-تۇز!» اتتى ۇلىستىڭ ۇلى كۇنىنە وراي ۇيىمداستىرىلعان مەرەكەلىك ءىس-شارا ءوتتى.
مادەنيەت جانە سپورت ءمينيسترى ارىستانبەك مۇحامەديۇلى «ەگەمەن قازاقستان» گازەتىنە بەرگەن سۇحباتىندا: «ءاربىر مەرەكەنىڭ وزىندىك سالماعى بار، ال ناۋرىز ءبىزدىڭ ۇلتتىق ەڭ ءبىرىنشى مەرەكەمىز! ءداستۇرىمىزدى دارىپتەپ، اسىل مۇرالارىمىزدىڭ بەدەرىن ايشىقتاۋدا ورنى ەرەكشە بۇل مەرەكەنى قازاق حالقى «جاقسىلىقتىڭ باستاۋى» دەپ ۇعادى»،– دەپ اتاپ كورسەتتى.
ۇلتتىق مۋزەي شاڭىراق كوتەرگەن كۇننەن باستاپ ناۋرىز مەرەكەسىن ءداستۇرلى تۇردە اتاپ ءوتىپ كەلەدى. ەلىمىزدىڭ تاريحى مەن مادەنيەتىنىڭ وشاعى بيىل دا اتالمىش مەرەكەنى ۇلكەن دايىندىقپەن وتكىزدى.
شارانىڭ اشىلۋ سالتاناتىندا ءسوز العان قر ۇلتتىق مۋزەيى ديرەكتورىنىڭ ورىنباسارى، عالىم، ارحەولوگ ج. تايماعامبەتوۆ: «كوپتەن كۇتكەن ناۋرىز مەرەكەسى – تەك قازاقتىڭ عانا ەمەس، بۇكىل تۇركى تىلدەس ەلدەردىڭ مەيرامى. بۇل كۇن كەشىرىم كۇنى، رەنجىسكەندەر تاتۋلاسىپ، جاستار ويىن-ساۋىق قۇرىپ، كۇللى جۇرت جاقسىلىققا بەت بۇراتىن كۇن. قازىرگى كەزدە ناۋرىز مەرەكەسى تاۋەلسىز قازاقستاندا زور ىقىلاسپەن تويلاناتىن حالىقتىق سيپاتتاعى سالتاناتتى مەيرامعا اينالدى. بۇل مەيرام ءار ۋاقىتتا ىرگەسى مىقتى بىرلىكتىڭ، ەڭسەلى ەلدىكتىڭ، ىرىس پەن باق-بەرەكەنىڭ مەرەكەسى بولىپ سانالادى»،– دەدى.
ۇلتتىق مۋزەيدىڭ جەر ءجۇزى جاڭعىرار وسى مەرەكە قارساڭىندا «تۇساۋكەسەر ءراسىمى» جوباسى بويىنشا بۇلدىرشىندەردىڭ داستۇرىمىزگە ساي تۇساۋى كەسىلدى. ەكى جىل بويى ومىرشەڭدىگىن كورسەتىپ كەلە جاتقان بۇل جوبانىڭ ماقساتى – اتا-اناسىنىڭ قامقورلىعىنان شەت قالعان سابيلەردىڭ ومىرىندەگى ماڭىزدى ساتتەرىنىڭ ءبىرىن مەرەكەگە اينالدىرۋ. سونىمەن قاتار، حالقىمىزدىڭ سالت-ءداستۇرىن دارىپتەپ، جاڭعىرتا ءتۇسۋ.
استانا قالاسىنداعى بالالار ۇيىنەن ارنايى كەلگەن سابيلەردىڭ تۇساۋىن ەلىمىزگە بەلگىلى تۇلعالار كەستى. اتاپ ايتار بولساق، بيىلعى جىلى بەس ءبۇلدىرشىننىڭ تۇساۋىن كەسۋ مىندەتى عالىم، انتروپولوگ ورازاق سماعۇلۇلىنا، عالىم، ارحەولوگ جاكەن تايماعامبەتوۆكە، جازۋشى، جۋرناليست قۋانىش جيەنبايعا، ءداستۇرلى ءانشى ەربولات شالدىباەۆقا جانە اقىن سەرىك سەيتىمانعا بۇيىردى. بىر ايتا كەتەرلىگى، وسى ۋاقىتقا دەيىن ۇلتتىق مۋزەيدە تۇساۋى كەسىلگەن 10 ءسابي بۇگىنگى تاڭدا ءوز وتباسىلارىن تاۋىپ، باقىتتى عۇمىر كەشىپ جاتىر.
«قوش كەلدىڭ، ناۋرىز، مول بولسىن ءدام-تۇز!» اتتى مەرەكەلىك شارا «تۇساۋكەسەر» راسىمىنەن كەيىن ناۋرىز مەرەكەسىنە ارنالعان «اڭىز الەمىندە» اتتى بالالار ەرتەڭگىلىگىمەن جانە «ىڭكار سەزىم» اتتى بالالار دەفيلەسىمەن جالعاستى.
ۇلتتىق مۋزەيدەگى مەرەكەلىك شارانى ارنايى تاماشاۋ ءۇشىن قارتتار ۇيىنەن 10 ادام شاقىرىلىپ، ارنايى قۇرمەت كورسەتىلدى. شاراعا كەلگەن قوناقتار مەن قاتىسۋشىلار ءتوس قاعىسىپ، كورىسۋ سالتىن ورىنداپ، مەرەكەلىك كونتسەرتتى تاماشالادى.
