ۆلاديمير جيرينوۆسكي قازاقستاننىڭ بۇرىنعى پرەزيدەنتى نۇرسۇلتان نازارباەۆتىڭ “باياعىدا-اق ءولىپ قالعانىن” ايتتى، دەپ حابارلايدى “ادىرنا” ءتىلشىسى. بۇل تۋرالى ساياساتكەر «كومسومولسكايا پراۆدا» راديوسىندا ايتتى.
«مەنىڭ ويىمشا، ول باياعىدا-اق قايتىس بولعان. ءولىپ قالعان، ونى جەرلەپ تاستادى. وسىلايشا تىنىش تىعىلىپ، ءۇنسىز قالىپ، ءتىرى ءجۇرۋ؟ بۇل مۇمكىن ەمەس. ونىڭ ۇستىنە ۇلتتىق قاۋىپسىزدىك كوميتەتىنىڭ توراعاسى بىردەن قاماۋعا الىندى»، - دەدى جيرينوۆسكي.
جيرينوۆسكيدىڭ ايتۋىنشا، حالىق بۇرىنعى باسشىلارىنا قارسى شىعىپ، قۇتىلعىسى كەلگەندىكتەرىن كورسەتتى.
بۇعان دەيىن باق ەكس-پرەزيدەنت نۇرسۇلتان نازارباەۆ ەلدەگى جاعداي تۋرالى بىردە-ءبىر مالىمدەمە جاساماعاندىقتان، ەلدەگى تولقۋلار كەزىندە قازاقستاننان كەتۋى مۇمكىن دەگەن بولجام جاساعان بولاتىن. كەيىن ونىڭ قازاقستاننان شىقپاعانى بەلگىلى بولدى.
نازارباەۆ 2019 جىلى ناۋرىزدا وتستاۆكاعا كەتتى. الايدا، وعان ۇلت كوشباسشىسى مارتەبەسى بەرىلدى، قاۋىپسىزدىك كەڭەسىنىڭ توراعاسى قىزمەتىن ساقتاپ قالدى جانە «نۇر وتان» پارتياسىنىڭ توراعاسى، كونستيتۋتسيالىق كەڭەستىڭ مۇشەسى بولىپ قالدى.
«ادىرنا» ۇلتتىق پورتالى
