شىمكەنتتە ەپيدەميولوگيالىق احۋالدىڭ ناشارلاۋىنا، كوروناۆيرۋس ينفەكتسياسىن جۇقتىرعانداردىڭ كۇرت كوبەيۋىنە بايلانىستى ەمحانالار كۇشەيتىلگەن رەجيمدە جۇمىس ىستەپ جاتىر. وسىعان وراي، قالا اكىمىنىڭ ءبىرىنشى ورىنباسارى شىڭعىس مۇقان №5 قالالىق ەمحاناعا بارىپ، دارىگەرلەردىڭ جۇمىسىمەن تانىستى.
—قازىر قازاقستان بويىنشا ەپيدەميولوگيالىق احۋال ناشارلاپ كەتتى. ءبىر تاۋلىكتە 9 122 ادام كوروناۆيرۋس جۇقتىرعان. ونىڭ ىشىندە شىمكەنت قالاسىنىڭ 320 تۇرعىنى بار. قالادا 1 مىڭنان استام ادام كوروناۆيرۋستان ەمدەلىپ جاتسا، سونىڭ ىشىندە 200-دەن استامى ستاتسيوناردا ەم قابىلداۋدا. بۇل — ءبىز بىلەتىن تسيفر. ال، ءبىز بىلمەيتىن، اۋىرسا دا ەمحاناعا بارماي، پتسر تەست تاپسىرماي جاتقان ادامدار قانشاما؟، — دەگەن شىڭعىس جۇمابەكۇلى تۇرعىنداردى اسا ماڭىزدى سەبەپ بولماسا، كوپشىلىك ورىنعا بارماۋعا جانە ۆاكتسينا سالدىرۋعا شاقىردى.
—قالادا بىلتىردان بەرى 600 مىڭنان استام ادام ۆاكتسينا قابىلدادى. سونىمەن قاتار 40 مىڭ ادام رەۆاكتسيناتسيالاندى. اسىرەسە، جۇكتى ايەلدەر، بالالار، ەگدە جاستاعى ادامدار مەن سوزىلمالى اۋرۋى بار ناۋقاستار مىندەتتى تۇردە ۆاكتسينا سالدىرۋى ءتيىس. بۇل — قاۋىپتى دەرتتەن ساقتانۋدىڭ جالعىز جولى، — دەدى ش.مۇقان.
قالا اكىمىنىڭ ءبىرىنشى ورىنباسارى №5 ەمحانانىڭ سيتۋاتسيالىق ورتالىعىنىڭ جۇمىسىمەن تانىستى. مۇنداعى جەدەل جەلىگە ءوز بويىندا كوروناۆيرۋس سيمپتومدارىن بايقاعان پاتسيەنتتەر حابارلاسا الادى. وعان دەرەۋ ءتيىستى مامانداردان قۇرالعان ءموبيلدى توپ جونەلتىلەدى. سونداي-اق، ماماندار ەرتەلى-كەش ەمحانادا تىركەلگەن جۇكتى ايەلدەر مەن قاۋىپ توبىنداعى ازاماتتارعا تەلەفون ارقىلى حابارلاسىپ، جاعدايىن ءبىلىپ وتىر.
ايتا كەتەيىك، №5 ەمحانادا بارلىعى 58 مىڭ ادام تىركەلگەن.
«شىمكەنت كەلبەتى» — ايدار قۇلجان،
فوتو سەرىك قوساەۆ
