كوروناۆيرۋس بىرتە-بىرتە ەندەميالىق ينفەكتسياعا اينالىپ جاتىر. بۇل تۋرالى دۇنيەجۇزىلىك دەنساۋلىق ساقتاۋ ۇيىمىنىڭ شۇعىل اۋرۋلار ءبولىمىنىڭ تەحنيكالىق توبى جەتەكشىسى ماريا ۆان كەركحوۆە ايتتى، دەپ حابارلايدى "ادىرنا" ۇلتتىق پورتالى ۇيىمنىڭ YouTube-ارناسىنا سىلتەمە جاساپ.
ۇيىم ساراپشىسى پاندەميانى بولجاۋ قيىنداپ بارا جاتقانىن ايتتى. ويتكەنى ۆيرۋس مۋتاتسياعا ۇشىراپ، وزگەرىپ جاتىر.
"ۆيرۋس ەندەميا سيپاتقا اينالىپ جاتىر. بۇل انىق. دەگەنمەن قازىر پاندەميا بەلەڭ الىپ تۇر: سىرقاتتانۋشىلىق كورسەتكىشى ءوسىپ بارادى، وعان قوسا ەلدەردىڭ دەنساۋلىق ساقتاۋ جۇيەسىنە دە اۋىرتپالىق تۇسەدى. ول كەزەڭگە ءالى جەتكەن جوقپىز", - دەدى ساراپشى.
ۆان كەركحوۆە ەلدەر ۆيرۋسقا قارسى ءارتۇرلى تاسىلمەن كۇرەس جۇرگىزەتىنىن، سوندىقتان COVID-19 پاندەمياسى قالاي داميتىنىن بولجاۋ قيىن ەكەنىن ايتتى.
"تۇماۋ جانە باسقا دا ماۋسىمدىق ينفەكتسيالار سياقتى بولجام جوق. مۇمكىن ونى جاسارمىز، بىراق قازىر ەمەس", - دەپ ءتۇسىندىردى جۇقپالى اۋرۋلار مامانى.
"ادىرنا" ۇلتتىق پورتالى
