Reseı prezıdenti Vladımır Pýtın 19 sáýir kúni keshke Ýkraınadaǵy barlyq áskerı is-qımyldardy ýaqytsha toqtatý týraly buıryq berdi, dep habarlaıdy “Adyrna” ulttyq portaly.
Bul týraly Kremldiń baspasóz qyzmeti habarlady.
«Pashalyq bitim» 19 sáýir saǵat 18:00-den 21 sáýir túngi 00:00-ge deıin kúshinde bolady.
Prezıdent bul málimdemeni RF qarýly kúshteri bas shtabynyń basshysy Valerıı Gerasımovpen kezdesý kezinde aıtty.
«Osy ýaqyt aralyǵynda barlyq áskerı is-qımyldar toqtatylsyn. Ýkraına tarapy da osyndaı qadamǵa barady degen úmittemiz. Degenmen, áskerlerimiz kez kelgen arandatýshylyq pen shabýylǵa daıyn bolýy tıis», – dedi Pýtın.
Reseı Qorǵanys mınıstrligi tıisti buıryqtardyń berilgenin rastady.
Ýkraına prezıdenti Vladımır Zelenskıı bul málimdemege jaýap qatty.
«Pýtın taǵy da adamdardyń ómirin oıynǵa aınaldyrmaq. Qazir Ýkraınada áýe dabyly jarııalandy. Saǵat 17:15-te Reseıdiń soqqy drondary aspanymyzda baıqaldy. Bizdiń áýe qorǵanys kúshteri men avıaııa áreket etýde. Bizdiń aspandaǵy “Shahedter” – Pýtınniń Pashaǵa jáne adam ómirine degen shynaıy kózqarasy», – dep málimdedi.
Aıta keteıik, buǵan deıin 2023 jyldyń qańtarynda Pýtın Rojdestvo merekesine oraı birjaqty bitim jarııalaǵan bolatyn. Alaıda ol kezde de soǵys jalǵasa bergen. Ýkraına tarapynan Anna Malıar bul bitimniń oryndalmaǵanyn jáne Reseıdiń toǵyz jyldyq soǵys barysynda eshbir bitimge berik bolmaǵanyn jazǵan edi.
