GIMNAZIIa OQÝShYLARY KOVIDKE QARSY EKPE ALÝDA

1376
Adyrna.kz Telegram

Shymkentte emhanalar men bilim berý uıymdarynyń egý pýnktterinde jasóspirimderdi koronavırýsqa qarsy vakınalaý qarqyndy júrip jatyr. Bul joly KVI-ge qarsy ekpe egý jumystary M.H.Dýlatı atyndaǵy úsh tilde oqytatyn mamandandyrylǵan №8 gımnazııasynda jalǵasty. Qalalyq №14 emdeý ortalyǵynyń dárigerleri mektepte jasóspirimderge ekpe saldy.

Mektep dırektory Aınur Sahovanyń aıtýynsha, atalǵan bilim uıasynda 12 men 17 jas aralyǵynda 883 oqýshy oqıdy. Onyń ishinde Komırnatı (Pfizer óndirýshi) vakınasyn saldyrýǵa 100-ge jýyq ata-ana nıet bildirgen. Qala turǵyny Gúljan Nurlyhanqyzy mekteptegi ekpe egý pýnktine eki balasyna vakına saldyrýǵa kelgen. Uly Daryn Abdraman 10-synypta oqysa, qyzy Sabıra Abdraman 9-synyptyń oqýshysy.

– Kóktemde jappaı vakınalaý bastalǵanda, jubaıymmen alǵashqylardyń biri bolyp ekpe qabyldadyq. Búgin balalaryma vakına saldyrýǵa arnaıy ózim keldim. Kúndelikti buqaralyq aqparat quraldary arqyly vakınanyń paıdaly ekenin aıtyp jatyr. Mekteptegi medbıke de bizge ekpe alýdyń tıimdi ekenin túsindirdi. Sondyqtan ulym men qyzyma vakına salamyz dep sheshtik. Buǵan deıin sozylmaly nemese juqpaly aýrýlarmen aýyrmaǵan. Týǵannan bastap barlyq ekpeni ýaqytynda saldyryp keldik. Sonyń arqasynda balalarym aýyrmady dep oılaımyn. Árkim sanaly túrde sheshim qabyldaıdy. Biz úshin ul-qyzymnyń saýlyǵy mańyzdy, qazir olardyń jaǵdaıy jaqsy, - deıdi Gúljan Tashmanova.

Al №14 emdeý ortalyǵynyń SÓS dárigeri Álııa Bekbolqyzy túske deıin mektepte 30-dan astam oqýshyǵa ekpeniń birinshi komponenti salynǵanyn málimdedi. Barlyq jasóspirimniń jaǵdaıy baqylaýǵa alynǵan. Alǵashqy 30 mınýtta kútý zalynda dárigerlerdiń baqylaýynda bolsa, 3 kún mekteptiń medbıkesi ekpe alǵan oqýshylardyń densaýlyǵyn qadaǵalap otyratynyn jetkizdi.

Azamat JÁDIGERULY

Pikirler