El Táýelsizdiginiń 30 jyldyǵyna oraı Shymkenttegi 8 shaǵynaýdandaǵy jastar alleıasynda «Kitap oqıtyn Shymqala» kitap almasý sharasy ótti.
Shymkent qalasynyń ortalyqtandyrylǵan kópshilik kitaphanalar júıesi Abaı atyndaǵy ortalyq kitaphanasynyń bastamasymen mundaı kóshedegi kitap sóreleri qalanyń birneshe buryshynan ashyldy. Eń áýeli, aýrýhanalar men ońaltý ortalyqtarynda, Qarataý aýdanynyń aýmaǵynda S.Báıterekov eskertkishi men №130 jalpy orta mektep mańynda ashylsa, bir apta buryn kitap sóresi Chernobyl apaty qurbandaryna arnalǵan gúlzarǵa ornatylǵan bolatyn.
Býkkrossıng buryshynyń ashylý saltanatyna fantast-jazýshy S.Isaq, «Rýhanı jańǵyrý» bóliminiń joba jetekshisi Myrza Omar, ardager-ustaz G.Sherimbetova, «Rýhanı jańǵyrý» keńsesiniń meńgerýshisi Zaýre Oralbaeva, №23 mektep-lıeıdiń muǵalimderi men oqýshylary qatysty. Bastama qala turǵyndaryna kitap oqý mádenıetin nasıhattap, kórkem ádebıetterdi qoljetimdi etý jáne óskeleń urpaqty otansúıgishtikke tárbıeleý maqsatynda qolǵa alynǵan.
Jıyn barysynda shaǵynaýdannyń turǵyny Marııa Pıvýarova ózi oqyǵan kitaptaryn syıǵa tartty.
— Bizdiń shaǵynaýdanda býkkrossıng buryshy ashylǵanyna óte qýanyshtymyn. Qala turǵyny retinde óz úlesimdi qosqym keldi. Jeke kitap qorymnan Paýlo Koelonyń «Alhımık», Reınboý Raýelldiń «Vernost» romandaryn syıǵa tarttym. Kitap sóresiniń mekteptiń janynan ashylǵany da óte ońtaıly sheshim dep bilemin,- deıdi ol.
Shymkent qalasynyń ortalyqtandyrylǵan kópshilik kitaphanalar júıesiniń dırektory Nūrıla Jumannyń aıtýynsha, kez-kelgen qala turǵyny sóredegi qyzyqtarǵan kitapty oqýǵa alyp, qaıta ornyna ákelse boldy. Sondaı-aq, úıindegi oqylǵan ádebıetterin býkkrossıng buryshyna syıǵa da qaldyra alady. Mundaı býkkrossıng buryshtaryn ornalastyrý keler jyly da jalǵasyn tappaq.
Kitap almasý buryshynyń ashylý saltanatynda «Túrkistan saraıynyń» ánshileri kelýshilerdi ónerlerimen tamsandyrdy.
Zamıra ALDABERGENOVA
