Shymkentte úsh magıstraldy sýaqqynyń qurylysy aıaqtaldy. Búginde atalǵan nysandarda qubyrlardy jýyp-shaıý jáne jalpy tekserý jumystary júrgizilýde.
4,48 shaqyrymdyq, 9,37 jáne 10,61 shaqyrymdyq magıstraldy sýaqqylardyń qurylys jumystary 2020-2021 jyldyń mamyr, maýsym aıynda bastalǵan. Qazirgi tańda qurylysy tolyǵymen aıaqtaldy.
Qala turǵyndaryn aýyz sýmen qamtamasyz etý ákimdiktiń basty mindetteriniń biri. Qala ákimi M.Áıtenov tıisti sala basshylaryna bul baǵyttaǵy júrgizilgen jumystarǵa kúndelikti júıeli túrde monıtorıng jasaýdy tapsyrǵan bolatyn.
Atalǵan magıstraldy qubyrlardyń tekserý jumystary aıaqtalǵanda 100 myńnan asa adam sapaly aýyz sýǵa qol jetkizedi. Nátıjesinde Asar-2, Dostyq, Soltústik saıajaı, Yntymaq, Yntymaq-2, Batys, Qyzyljar, Igilik, Jańatalap, Táýelsizdikke-20 jyl jáne Kókbulaq turǵyn alabyna aýyz sý kezeń-kezeńmen berile bastaıdy.
