Bir kezderi "Gúlder" ansambliniń bedeldi solısi bolǵan Amangeldi Shyńǵysov búginde dalada qańǵyp júr. Aıtýynsha, uly men kelini ony úıden qýyp shyqqan, dep habarlaıdy "Adyrna" ulttyq portaly Stan.kz saıtyna silteme jasap.
82 jastaǵy Amangeldi Shyńǵysov Qurmanǵazy atyndaǵy qazaq ulttyq konservatorııasyn bitirgen. Ónerdegi jolyn bir kezderi ataǵy dúrkiregen "Gúlder" ansamblinen bastaǵan. Jubaıy qaıtys bolǵan qarııa osy ýaqytqa deıin ulymen birge turyp kelgen.
Alaıda jalǵyz atustary otbasyn qurǵan soń, ákesin úıden qýǵan. Qarııanyń sózinshe, ony buǵan ıtermelegen - kelini.
"Balamdy úılendirip, toıdy bitirdik. Toıdan keıin úıge qurby-qurdastarymen keldi. Men kedergi keltirmeı-aq qoıaıyn dep týysymnyń úıine ketip qaldym. 2 kún qondym. Balam joldastaryn shyǵaryp salýǵa ketken. Kelin úıde qalǵan.
Maǵan: "Seni polıııaǵa jiberemin. Jyndyhanaǵa túsiremin", - dedi. Ulyma: "Myna qyzdy qaıdan taptyń?" - dedim. Ulym eshteńe demedi, áıeliniń aıtqanyn tyńdaıdy", - deıdi qarııa uly Sát jaıynda.
Aqsaqaldyń aıtýynsha, onyń bar kinási kelinge unamaǵanynda. Alaıda baǵdarlamaǵa suhbat bergen qarııanyń uly ákesiniń ishimdikke salynyp, kún bermegenin aıtady.
"Aldymen ol kisi saý degen anyqtama ákelińizder. Sosyn sóılesemiz. Barlyq týystarymyz dáleldeıdi. Men esimdi bilgeli, araq ishedi. Men úılengenge deıin de ákemmen eshqandaı qarym-qatynas bolǵan emes. Táýliktep dalada júretinmin, sebebi ol ishetin", - dedi Sát Amangeldiuly.
Qarııa ulynyń sózin joqqa shyǵardy. Keńestik kezeńde ishkenin, sońǵy 15 jylda aýzyna almaǵanyn aıtty.
"Ketpeseń, ekeýi ajyrasamyz, dedi. Sosyn men Aqtóbege qaryndasyma ketip qaldym. Eki jyl turdym. Qaryndasym qaıtys bolǵan soń, ketip qaldym. Óıtkeni ózi bolmaǵan soń, balalarynyń kózqarasy basqasha ǵoı", - deıdi qarııa.
Amangeldi Shyńǵysovty beıtanys azamat temir jol vokzalynan baıqap qalǵan. Jaǵdaıyn bilgen Shyńǵys Baıserikov qarııany hostelge deıin jetkizip salǵan. Aıtýynsha, 117 myń teńge zeınetaqy alatyn qarııanyń bar aqshasy qonaq úı aqysyna ketýde.
Mýzykanttyń qańǵybasqa aınalǵanyna jarty aıdan asypty. Baǵyna oraı, hostel basshysy da meıirimdi jan bolyp shyǵypty. Qadirbek Jolamanov qarııanyń jaǵdaıyn bilip, tegin turýǵa ruqsat beripti. Basqasy azdaı, qarııa kelininen taıaq jegenin aıtady.
"Basymnan shvabramen uryp, qol jumsady. Dárethanaǵa kirsem, artymnan teýip jiberetin", - deıdi qarııa.
Qarııa 1970 jyldardan beri Almaty ortalyǵynda ornalasqan úsh bólmeli páterde turyp kelgen. Zańgerdiń aıtýynsha, ol úı sol kezde turǵan (Amangeldi qarııa, jubaıy, uly, qyzy) barlyq adamǵa birdeı tıesili. Áıtkenmen, úıdiń kóp bóligi qarııanyń enshisinde. Al Amangeldi Shyńǵysovtyń ózi "bir bólmeniń ózi jetkilikti" dep otyr. Biraq tasjúrek kelinimen birge turýǵa túbegeıli qarsy.
"Adyrna" ulttyq portaly
