Shymkentte buqaralyq sportpen shuǵyldanýshylar kóbeıýde

616

Táýelsizdiktiń 30 jyldyǵyna oraı Shymkentte jappaı júgirý ótti. Asanbaı Asqarov atyndaǵy dendrologııalyq saıabaqta sportshylar, sport mektepteriniń qyzmetkerleri men jattyqtyrýshylar qatysty. Salaýatty ómir saltyn nasıhattaıtyn is-shara el táýelsizdiginiń mereıtoıy jáne Memleket basshysynyń halyq arasynda buqaralyq sportty damytý tapsyrmasyn oryndaý aıasynda júzege asyrylyp otyr, deıdi jaýapty mamandar.

– Búgingi buqaralyq júgirýdi de el táýelsizdiginiń 30 jyldyǵyna arnap otyrmyz. Búgingi – úshinshi júgirýge qalalyq dene shynyqtyrý jáne sport basqarmasyna qarasty 29 mekemeniń qyzmetkerleri jumyldyrylǵan. Qatysýshylar 1,7 jáne 7 shaqyrymǵa júgiredi. Jalpy, Prezıdenttiń buqaralyq sportty damytý tapsyrmasy Shymkent qalasynyń ákimi Murat Dúısenbekulynyń tikeleı baqylaýymen atqarylýda. Búgingi tańda Shymkent turǵyndarynyń 31 paıyzdan astamy buqaralyq sportpen shuǵyldanady. Alda osy mejeni 34 paıyzǵa jetkizý jospary bar. Osy maqsatta úılerdiń aýlalaryna jalpy sany 115 sport alańshasyn salý týraly keshendi jospar júzege asyrylýda. Onyń ishinde 14 alańshany kásipkerler óz tarapynan salyp, qala turǵyndaryna syıǵa tartady, – dedi basqarma basshysynyń orynbasary Ermek Dármenov.

Buqaralyq júgirýge uzyn-sany 300-ge jýyq adam qatysty. Qatysýshylar aldymen dene qyzdyrý jattyǵýlaryn jasap alyp, sodan keıin eki qashyqtyqta júgirip ketti. Jeńimpazdar merekege qaraı ótetin saltanatty is-sharada marapattalmaq.

Pikirler
Redakııa tańdaýy