Shymkent qalasynyń turǵyn úı basqarmasynyń basshysy Azamat Rysjanov turǵyndardyń baspana máselesine qatysty ótinishterin tyńdap, jeke qabyldaý júrgizdi.
Basqarma basshysy 30-ǵa jýyq azamatty qabyldady. Baspana máselesimen kelgenderdiń biri qala turǵyny Maıra Izbasarova. Turǵyn úı kezegine halyqtyń áleýmettik álsiz toby sanatynda tolyq emes otbasy retinde 2012 jyly tirkelgen. Ol turǵyn úı kezeginiń sońǵy ýaqyttarda aıtarlyqtaı jyljyp jatqandyǵyn egov elektrondyq portaly arqyly baqylaý barysynda baıqaǵan.
Basqarma basshysy Zańǵa sáıkes memlekettik turǵyn úı qorynan turǵyn úı belgilengen tártippen kezek reti boıynsha beriletindigin jetkizdi.
Atalǵan shara barysynda A. Rysjanov «Nurly jer» memlekettik baǵdarlamasy aıasynda nesıelik negizde «Shańyraq» baǵytynyń qatysýshylaryna turǵyn úı sertıfıkatynyń talaptary men sharttaryn túsindirip ótti.
Sonymen qatar turǵyn úı kezegindegi azamattardyń kezek reti basqarma tarapynan atqarylyp jatqan jospar boıynsha jáne júrgizilip jatqan túgendeý jumystaryna sáıkes tıisti deńgeıde jyljyp jatqandyǵyn atap ótti.
Turǵyn úı kezegine qatysty qyzmetter búginde tolyǵymen avtomattandyrylǵan. Azamattar ózderiniń turǵyn úı kezek retin egov elektrondyq portaly arqyly baqylaı alady
Aıta ketý kerek, kredıttik baǵytta baspanaly bolýdy kózdegen azamattar úshin «Shańyraq» baǵdarlamasy boıynsha nesıelik negizde jyldyq mólsherlemesi 5 paıyzben beriletin úılerge tikeleı satylym boıynsha ótinimder «Otbasy» bank arqyly aǵymdaǵy jyldyń 15 qyrkúıekten-13 qazan aralyǵynda júrgizilýde.
«Otbasy» banki jarııalaǵan aqparattarǵa sáıkes, Shymkent qalasynda «Baqytty otbasy» baǵdarlamasynyń negizgi tizimindegi tólem qabilettigin rastaǵan, alaıda áli páter izdeý ústinde nemese negizgi tizimde, áli bankke kelmegen azamattar «Shańyraq» baǵyty arqyly berilip jatqan baspanalardy 2 paıyzdyq jeńildetilgen kórsetkishpen ala alady. Baǵasy naryqtan tómen baspanany alý úshin baspana.otbasybank.kz saıty arqyly azamattar óz ótinishterin joldaı alady. Qalǵan azamattar úshin Shańyraq baǵdarlamasy boıynsha alǵashqy jarna 10 %, nesıe 5 %-ben beriledi.
