Mańǵystaýda besinshi táýlik qatarynan janyp jatqan órtti joıý máselesi talqylandy, - dep habarlaıdy "Adyrna" tilshisi.
13 maýsymda Mańǵystaý oblysynyń ákimi Bozashy túbeginiń soltústik-batys bóligindegi Ońtústik Qaraturyn munaı-gaz ken ornyndaǵy burǵylaý kezinde shyqqan órtke baılanysty shuǵyl keńes ótkizdi. Keńeske energetıka vıe-mınıstri Ashat Hasenov, "QazMunaıGaz" AQ, "Ózenmunaıgaz" AQ basshylyǵynyń jáne osy kompanııanyń basqa da bólimsheleri men merdigerleriniń ókilderi qatysqan.
Olar órtti joıý sharalaryn usyndy. "Bozashy munaı" JShS bas geology Aleksandr Kasıanenko uńǵymanyń shuńqyryn aýyr burǵylaý eritindisimen toltyrýdy nemese uńǵymaǵa qosymsha búıirlik burǵylaýdy usyndy. Keıbir qatysýshylar gaz qysymynyń tómendeýine baılanysty órt ózdiginen joıylýy múmkin degen boljam jasady.
"Bizde gaz qysymy ózdiginen tómendep, órttiń ózi basylǵansha kútýge ýaqyt joq. Órtti sóndirý algorıtmi shuǵyl túrde jasalýy kerek. Barlyq jaýapty tulǵalar qosylýy qajet. Qarjylandyrýdyń talap etiletin kólemi men materıaldyq-tehnıkalyq baza – munyń bári algorıtmde kórsetilýi tıis", - dedi sala ardageri Baltabek Qýandyqov.
Oblys ákimi uńǵymaǵa túsetin gazdyń kólemi men qysymyn anyqtap, ken ornyndaǵy órtti joıý boıynsha jedel is-sharalar josparyn ázirleý qajet ekenin atap ótti. Sarapshylardyń aldyn ala boljamy boıynsha, tehnogendik apattyń yqtımal sebebi uńǵymany burǵylaý boıynsha qurylys jumystary kezinde uńǵyma saǵasyndaǵy jarylýdyń aldyn alý qondyrǵysynyń qysymynyń tómendeýi bolyp tabylady.
