El Táýelsizdiginiń 30 jyldyǵyna oraı Shymkent qalalyq ortalyqtandyrylǵan kópshilik kitaphanalar júıesina qarasty Abaı kitaphanasy men «Visit Shymkent» týrıstik aqparattyq ortalyǵy shahmattan týrnır ótkizdi. Oǵan «Aq tulpar» ardagerler shahmat klýby men «Jas tolqyn» jastar komandasy qatysty. Shymkent qalalyq ardagerler keńesiniń tóraǵasy K.Tólebaev týrnır qatysýshylaryna sáttilik tiledi.
Búginde Shymkent – elimizdiń shahmat ortalyǵyna aınalyp otyr. Álemdi moıyndatqan shahmatshylardyń Shymkentten qanattanyp, osynda ózderiniń shahmat mektebin qalyptastyrýy da sózimizge dálel. Al, búgingi týrnır aǵa býyn men óskeleń urpaq arasyndaǵy baılanysty nyǵaıtyp, shahmatty qalyń buqaraǵa nasıhattaý jáne kitaphana oqyrmandarynyń sanyn arttyrý maqsatynda uıymdastyrylyp otyr.
Týrnırge áýesqoı 7 jup qatysty. Bas tóreshi Dáýlet Nııazbek bastaǵan tóreshiler qatysýshylardyń oıynyn jiti qadaǵalap, tórelik etti.
Saıysta «Aq tulpar» ardagerler klýbynyń ókilderi basymdyqpen alǵa shyqty. Júldeli birinshi oryndy ardager K.Jumaqov ıelense, II oryn N.Qonysbekovke buıyrdy. Al, ardager A.Tashmanov úshinshi oryndy qanjyǵalady. Oıyn sońynda jeńimpazdar túrli dárejeli dıplomdarmen, arnaıy syılyqtarmen marapattalady.
Aıta keteıik, sharaǵa «BalTekstil», «MEY», «Delix», «TOP SELLER of CHEMICAL PRODUCTS» kásiporyndary men «Shara-bara» servıs ortalyǵy demeýshilik kórsetti.
