QR Táýelsizdiginiń 30 jyldyǵyna oraı Shymkent qalasynyń 4 aýdanynda «Jastar resýrstyq ortalyǵynyń» bólimsheleri ashyldy. Ortalyqtyń ashylýyna qala ákimi Murat Áıtenov pen «Qazaqstan jastar kongresi» zańdy tulǵalar birlestiginiń atqarýshy dırektory Toqtar Bolysov qatysty. Shara barysynda qala ákimi jastar ortalyǵynyń jumysymen tanysyp, yntymaqtastyq memorandýmyna qol qoıdy.
Búgin Shymkentte el Táýelsiziginiń 30 jyldyq mereıtoıyna oraı «Jastar resýrstyq ortalyǵynyń» bólimsheleriniń ashylý saltanaty ótti. Ortalyq basshysy Erlan Aıtbaev, sharaǵa arnaıy qatysqan qala ákimin Qarataý aýdandyq jastar ortalyǵynyń jumystarymen tanystyrdy. «Aýdan turǵyndaryna qaladaǵy jalǵyz ortalyqqa kelý qıyndyq týǵazǵan soń, bólimsheler ashý týraly sheshim qabyldadyq» deıdi qala ákimi.
Murat Áıtenov, Shymkent qalasynyń ákimi: «Ár aýdanǵa bir-bir jastar ortalyǵyn ashyp jatyrmyz. Onda birinshiden jastarymyz konsýltanttyq orynǵa kele alady. Jastardyń jumysqa ornalasýy, qalamyzdaǵy bıznes salasyndaǵy josparlarǵa, otbasy quryp ony damytýǵa áreket jasaýǵa úlken ortalyqtar bar».
Ortalyqta jumys isteıtin kitaphana kúnine 10-15 adamdy qabyldaýǵa múmkindigi bar. Al kovorkıng bólimi bir ýaqytta 12 jas azamattardy jumys ornymen qamtı alady. Psıholog-medıatorlar jastarmen jumys isteý maqsatynda arnaıy jınaqtar daıyndaǵan.
Sondaı-aq, ashylý saltanatynda Murat Áıtenov «Qazaqstan jastar kongresi» zańdy tulǵalar birlestiginiń atqarýshy dırektory Toqtar Bolysovpen yntymaqtastyq memorandýmyna qol qoıdy. Kongres dırektorynyń aıtýynsha, «aýdan kólemindegi jastar ortalyǵy alǵash bolyp Shymkent qalasynda ashylyp otyr».
Tohtar Bolysov, «Qazaqstan jastar kongresi» zańdy tulǵalar birlestiginiń atqarýshy dırektory: «Osyndaı ortalyq eshbir óńirlerde joq, aýdandyq deńgeıde. Keıbir óńirlerde bar, keıbirinde nasharlaý. Biraq dál osyndaı aýdandyq «Jastar resýrstyq ortalyǵyn» birinshi ret kórip turmyn. 17 óńirdi birneshe ret aralaǵanmyn, tájirıbemniń arqasynda osyny aıta alamyn».
Paıdalanýǵa berilgen 2 qabatty ortalyq birden 50-100 adamǵa negizgi 5 baǵyt boıynsha qyzmet kórsete alady. Atap aıtsaq, «Jastarǵa qyzmet kórsetý», «Talantty jastardy qoldaý baǵyty, «Kovorkıng ortalyǵy», «Shaǵyn kitaphana», «Psıhologııalyq keńes berý». Sonymen qatar, ortalyq janynan jastardyń bos ýaqytyn tıimdi paıdalanýǵa arnalǵan 7 úıirme-klýbtary qurylǵan.
Gúldana Dáýren
