Shymkentte boı kótergen «Rahmet saǵan, Anashym» qoǵamdyq birlestigi «Imandylyq – júrekke uıalasa» atty taqyrypta is-shara uıymdastyrdy.
Merekelik jıynnyń basty ereksheligi, kezdesýge 18 jastan asqan múmkindigi shekteýli jandar men analary arnaıy shaqyrtý aldy. Aıtýly azamattar endi, qajettiliktermen qamtylǵan ortalyqqa turaqty túrde keletin bolady.
«Aq kógershin» ánin shyrqaǵan Áseldiń búgin týǵan kúni. Taǵdyrdyń taýqymetine moıymaǵan qaısar qyz 27 jasqa toldy.
Endi erekshe jandar úılerinde qamalmaı «Rahmet saǵan ,anashym» qoǵamdyq birlestiginde ózderiniń qatarymen júzdesip kóńilderin kóteredi. Sonymen qatar osyndaǵy ońaltý bólmesinde saýyqtyrý jattyǵýlaryn jasaıdy.
Al Jahangerdiń anasynyń qýanyshy tipti erekshe. Sebebi, birlestikke kelgennen beri 20 jastaǵy ulynyń ómirge degen qulshynysy artqan.
Naǵıma Tilegenova, Jahangerdiń anasy: «Bir aı boldy osy jerge kelip jaqsy bolyp qaldy. Áıtpese, balam kúızelisten tamaq jeýden qalǵan edi.Myna birlestikte ózi sııaqty dostar taýyp meıirimdi jandarmen tabysyp , óziniń jalǵyz emes ekendigin túsindi».
Qoǵamdyq birlestiktiń ashylýyna uıytqy bolǵan erekshe jandardyń analary. Solardyń biri birlestiktiń tóraıymy, eki erekshe jannyń anasy.
Almagúl Kenjetaeva, «Rahmet saǵan, anashym» qoǵamdyq birlestiginiń tóraıymy: «Úkimet tarapynan 18 deıingi múgedek balalarǵa qamqorlyq bar, ońaltý ortalyqtary, sanatorıı, kýrortqa joldama beriledi. 18 asqan soń olar asa qoldaýdy qajet etedi. qazir mine osyndaı balalarǵa ázirshe 12 balaǵa ońaltý ortalyǵyn ashyp otyrmyz».
Jergilikti bılik , jomart jandardyń qoldaýy arqasynda birlestik qyzmetin keńeıtpek. Mundaı jospar túzýge qala ákimdigi tarapynan jóndeýden ótken ǵımarat, demeýshilerdiń kómegi sep boldy deıdi osyndaǵylar. Aǵynan jaryla alǵys bildirgender qatarynda Dáýlettiń anasy Bahtyly da bar: » Allaǵa shúkir, atqa minip, jattyǵýlar jasap qazir azamat, barlyǵyna rahmet».
Maqsut Sársenbaev, «Synaq» qoǵamdyq birlestiginiń múshesi: «18 jastan asqan múgedekterge» Shapaǵat» ońaltý ortalyǵy bar. Mine taǵy bir ortalyq jumysyn bastady. Ol jaqsy qoldaý. Biraq aıtarym múgedekter qalada, memleketimizde az bolsyn».
Erekshe balalardyń qoǵamǵa beıimdelip, ómir súrýine analarynyń eńbegi orasan deıdi, demeýshiler. Aıtýly merekelik sharada barlyq aýyrtpashylyqtardy sanamen saralap, keleshekti oılaǵan analarymyz bir sátke bolsa da qıyndyqty umytyp, balalarymen kóńil kóterdi.
Shynar Orazova
