Shymkenttikter álem chempıonatynan oralǵan jeńimpaz boksshyny qarsy aldy

1946
Adyrna.kz Telegram

Shymkent halyqaralyq áýejaıynda Serbııada ótken bokstan eresekter arasyndaǵy álem chempıonatynyń kúmis júldegeri Mahmud Sabyrhandy zor qurmetpen qarsy aldy.

Bylǵary qolǵap sheberin kútip alýǵa qala ákiminiń orynbasary Maqsut Isahov, Sıdneı olımpıadasynyń kúmis júldegeri Muhtarhan Dildábekov pen qalalyq dene shynyqtyrý jáne sport basqarmasynyń basshysy Baýyrjan Tumanbaev, sportshynyń ata-anasy, týystary men bapkerleri, jankúıerleri jınaldy.

– Álem chempıonatynan kúmispen oralsam da, úlken qurmetpen kútip alǵan, tileýles bolǵan barsha jankúıerge rahmet. Bul álem birinshiligine áý basta altyn alamyn dep barǵanmyn. Kúmis medal buıyrdy, oǵan da táýba. Fınalǵa deıin 4 jekpe-jek ótkizdim. Barlyǵynda basymdyq tanyttym. Al aqtyq syndaǵy japon boksshysyna qaı jaǵynan ese jibergenimdi bilmeımin. Biraq ústem boldy. Árıne, bul jarys maǵan úlken tájirıbe syılady. Bul bastamasy ǵana. Alda talaı dúbirli syn kútip tur. Aldaǵy jyly Azııa oıyndary ótedi. Kóp uzamaı Tashkentte lıenzııalyq álem chempıonatynyń jalaýy jelbireıdi. Sol básekelerge daıyndalyp, osy joly ketken eseni qaıtaramyz, - dedi ol.

Aıta keteıik, Qazaqstan quramasy Belgradtaǵy álem chempıonatynda bes júldege ıe boldy. Qurama sapynda Temirtas Júsipov (48 keli) pen Sáken Bıbosynov altyn, Mahmud Sabyrhan (54 keli) men Serik Temirjanov (57 keli) kúmis medal enshiledi. Al ulttyq qurama kapıtany, 67 kelidegi Abylaıhan Júsipov qola medalǵa qol jetkizdi. Jalpy komandalyq esepte Kýba top jardy. «Bostańdyq aralynyń» ókilderi 3 altyn, 2 qola medalǵa qol jetkizdi. Ekinshi orynǵa Qazaqstan ornalassa, úzdik úshtikti AQSh quramasy qorytyndylady. Olardyń enshisinde 2 altyn, 2 kúmis medal bar.

Azamat JAPPAR
Foto Serik QOSAEV
ShYMKENT KELBETI

Pikirler