Astanada jekemenşık stomatologiialyq klinikada 18 tısın emdeu barysynda köz jūmǧan üş jasar qyzdyŋ ölımıne qatysty sot prosesı jalǧasyp jatyr, dep habarlaidy "Adyrna" ūlttyq portaly Tengrinews-ke sıltep.
18 jeltoqsanda ötken jaryssöz kezınde prokuror aiyptaluşy anesteziologqa amnistiia qoldanudy sūrady.
Memlekettık aiyptauşy Erkebūlan Şalqarov sottan aiyptaluşyny tört jylǧa bas bostandyǧynan aiyryp, üş jyl merzımge medisinalyq qyzmet körsetuge bailanysty lauazymdardy atqaru qūqyǧynan aiyrudy sūrady. Aiyptau tarapy ıs boiynşa jeŋıldetetın de, auyrlatatyn da män-jailar anyqtalmaǧanyn mälımdedı.
Sonymen qatar prokuror Konstitusiianyŋ 30 jyldyǧyna bailanysty qabyldanǧan amnistiia turaly zaŋǧa säikes būl qylmysty onşa auyr emes qylmystar sanatyna jatqyzu qajet ekenın atap öttı. Osyǧan bailanysty aiyptaluşyny negızgı jazadan bosatudy sūrady.
Sondai-aq prokuror densaulyq saqtau ministrlıgınıŋ būiryqtarynda anesteziiaǧa qarsy körsetılımderdıŋ naqty tızımı joq ekenın, därıger men anesteziologtyŋ taldaular men anamnezdı baǧalaudaǧy mındetterı naqty körsetılmegenın aitty. Osy olqylyqtardy joiu üşın sottan ministrlıkke qatysty jeke qauly şyǧarudy ötındı.
Osyǧan ūqsas taǧy bır oqiǧa Qaraǧandy oblysynyŋ Balqaş qalasynda tırkeldı. Mūnda sot pasienttıŋ ölımıne qatysty aiyp taǧylǧan hirurgke qatysty qylmystyq ıstı merzımnıŋ ötuıne bailanysty toqtatyp, ony qylmystyq jauapkerşılıkten bosattyy.
QazTAG mälımetınşe, qylmystyq qūqyq būzuşylyq 2023 jylǧy 6 qaraşada oryn alǧan. Al qylmystyq jauapkerşılıkke tartu merzımı ekı jyl bolǧan. Osyǧan bailanysty ıs nereabilitasiialyq negızder boiynşa toqtatyldy.
Tergeu barysynda hirurgtıŋ klinikalyq hattamalardy būzyp, hirurgiialyq aralasu turaly şeşımdı der kezınde qabyldamaǧany jäne dūrys emes em taktikasyn taŋdaǧany anyqtalǧan. Būl nauqastyŋ jaǧdaiynyŋ naşarlauyna, keiınnen ölımıne äkelgen.
Prokuror ıstı merzımnıŋ ötuıne bailanysty toqtatudy sūrasa, jäbırlenuşı tarap būǧan qarsylyq bıldırıp, aiyptau ükımın şyǧarudy talap etken. Sot qaulysy äzırge zaŋdy küşıne engen joq.
