Jetısu oblysynda qazaqtyŋ aqiyq aqyny Mūqaǧali Maqataevtyŋ 95 jyldyǧyna arnalǧan poeziialyq keş, taqyryptyq ekskursiia, döŋgelek üstel, jergılıktı aqyn-jazuşylarmen kezdesu siiaqty bırqatar mädeni şaralar ūiymdastyryluda. Sonyŋ ışınde aqyn öleŋderıne jazylǧan änderden «Esıŋe menı alǧaisyŋ» oblystyq änşıler baiqauy ötkızılıp, B. Rimova atyndaǧy akademiialyq drama teatrynyŋ «Mūqaǧali» monospektaklı qoiyldy, dep habarlaidy Jetısu oblysy äkımınıŋ baspasöz qyzmetı.
Taldyqorǧandaǧy Däneş Raqyşev atyndaǧy oblystyq filarmoniiada ötken änşıler baiqauyna Jetısudyŋ audan-qalalarynan 16-35 jas aralyǧyndaǧy 29 änşı ekı nominasiia, atap aitqanda, dästürlı än jäne estradalyq än boiynşa saiysqa tüstı.
- Aqynnyŋ san aluan taqyryptaǧy öleŋderıne än jazǧan kompozitorlar sanynda esep joq. Sol änder bügınde el igılıgıne ainalyp, ūrpaqtan-ūrpaqqa jalǧasyp keledı. Baiqaudy ötkızude Mūqaǧali Maqataevtyŋ öleŋderıne jazylǧan änder men jaŋa oryndauşylardy anyqtap, jastar arasynda önerge degen qūştarlyqty arttyrudy, aqyn mūrasyn keŋınen nasihattaudy maqsat etıp otyrmyz, - dedı oblystyq mädeniet, arhivter jäne qūjattama basqarmasynyŋ basşysy Quanyş Süleimenov.
Būl rette baiqaudyŋ ırıkteu kezeŋıne öŋırdegı ruhaniiat salasynda qajyrly eŋbek etıp jürgen azamattar qazylyq ettı. Baiqau būdan ärı jüldegerlerdı marapattau men gala konsertpen jalǧasady.
Aqynnyŋ tuǧan künıne orailastyrylǧan mädeni şaranyŋ bırı – «Mūqaǧali» monospektaklı. Qoiylymnyŋ basty keiıpkerın qoiuşy rejisserı, akter, QR Eŋbek sıŋırgen qairatkerı Safuan Rysbaiūly somdady. Spektakl eksperimenttık joba retınde B. Rimova atyndaǧy akademiialyq drama teatrynyŋ foiesınde qoiyldy.
Spektakl rejisserlerınıŋ bırı Ūlan Ahmetovtıŋ aituynşa, monospektakl aqynnyŋ jan aiqaiyn, mahabbat pen mūŋǧa toly älemın, ömır men uaqyt jaily tereŋ tolǧanysyn poeziia tılımen örnekteidı. Qoilymnyŋ ūzaqtyǧy - 45 minut, ol aqynnyŋ ömırı men şyǧarmaşylyǧyn tanytatyn bes kezeŋge bölıngen.
Atap ötsek, qoiylym rejisserlerı – Ūlan Ahmetov, Safuan Rysbaiūly, kompozitory – Tūrsynjan Şapai. Aqyn rölınde: Safuan Rysbaiūly, sol siiaqty rölderde Darhan Düisenov, Künekei Mūhtarhan, Ariza Asqarova, Qaraqat Şyndäulet, Äsem Mūratova oinady.
