Azyq-túlikke aqshamyzdy ázer jetkizemiz – saýdager

3874
Adyrna.kz Telegram

Arbadaǵa dorba, dorbadaǵy taýar. Aýyl-aımaqtan kózimiz shalyp júrgen saýdager apalarymyzdyń turmys-tirshiligi, saýdadaǵy tabys kózi kóbimizge qyzyq. Óziniń kúndelikti tabysyn arbasyna ala dorbasyn tıep, aýyl-aýyldy aralap, saýda-sattyqpen taýyp júrgen Raıa apamyzdyń jaı-kúıin "Adyrna" tilshisi surap bildi. 

- Raıa apa, bul kásippen aınalysyp júrgenińizge qansha ýaqyt boldy?

- Meniń saýda-sattyqpen aınalysyp júrgenime 10 jyldan asty. Bastapqyda ish kıim, náskı syndy dúnıelerdi ǵana satatynmyn. Bálkim bizdiń baǵamyz halyqtyń jaǵdaıyna sáıkes kele me, áıteýir arzan bolǵan soń ózge de taýarlarǵa suranys kóbeıdi. Aýyldaǵy analar úı sharýasymen kóp jerlerge, bazar aralaýǵa shyǵa almaıdy. Qora-jaıdyń sharýasymen qoldary da tımeıtin shyǵar. Sol bizdiń saýdamyzdy kelinshekter júrgezip otyr ǵoı.

- Taýarlaryńyzdy qaı jaqtan aldyrasyz?

- Mendegi kıim-keshektiń kóbi Ózbekstan men Bishkektiń ónimderi. Óz elime Ózbekstanǵa barǵanymda taýarlar alyp qoıamyn. Keıin osy elge kelgenimde satýǵa tyrysamyn. Kez kelgen saýdager syndy men de óz zattarymnyń satylyp ketkenin qalaımyn. Biraq amal neshik. Qazir burynǵydaı emes. Kóbi almaıdy.

- Kúndelikti tabysyńyz qansha?

- Keı kisiler bir ashqanymda 3-4 myń teńgege saýda jasaıdy. Bireýler bir-eki náskı alyp qana qoıady. Shynymdy aıtsam ártúrli. Biraq bizdiń de taýardy alatynymyz bar, shekaradan ótetinimiz bar, jolymyzdyń aqshasy bar. Bala-shaǵaǵa jeterlik, shúkir deımiz. Alaıda, tapqan aqshamyzdy azyq-túlikke áreń jetkizemiz.

-Karantın kezinde saýdańyz qalaı júrdi? Eldiń bári úıinde, halyq eshqaıda shyqpaı-aq kıim-keshekti sizden aldy ma?

-Qaıdaǵy, qyzym aý. Biz de qarapaıym jandarmyz. Bizge de jan kerek. Karantınde zańǵa baǵynyp biz de úıde otyrdyq. Shekara jabyq, taýar joq. Taýar bolmasa, saýda bolmasa qaıdan tabys bolsyn.

-Saýdańyz júrsin, apa! Jaýaptaryńyzǵa raqmet!

Áńgimelesken: Dına LITPIN,

"Adyrna" ulttyq portaly

Pikirler