Bızdıŋ qoǧamnyŋ jemqorlarynyŋ sany dalasyndaǧy ormanyndaǧy aǧaştarynyŋ sanynan da asyp barady.
Jalpy, sözdıŋ tüiını mynau! Sız ädılettı, demokratiialyq qūndylyqtardy eskeretın, zaiyrly, zaŋ üstemdık qūratyn qoǧamda ömır sürgıŋız keledı me!? Būl bolaşaqty jarqyn eteiık degen ärbır qazaqstandyq azamat üşın strategiialyq sūraq bolsyn!
Al, mūndai qoǧam qūryluy üşın ärbır qazaq azamatynyŋ dılındı osy sūraqqa jauap daiyn boluy kerek. Sol jauap daiyn bolǧan kezde ǧana äreketke köşemız. Bızge AQŞ demokratiia ornatyp beredı, anau öitıp beredı degennıŋ bärı bos söz. Sız aidaladaǧy AQŞ-ty aitpai-aq qoiyŋyz, sızge qazır tuysqanyŋyz da kömek bere almaityn jaǧdai bolady. Tek olardan kerektı dünielerdı alatyn şyǧarmyz. Bıraq bızge eldıktı tek özımızdıŋ janaşyr azamattarymyz ǧana ornatyp beredı. Ol - sız ben bız!
Äleumettık jelını baiqap qarasam, bızdıŋ keibır azamattarymyz "Tūrsynbektı keşıreiık, elge tanymal adam ǧoi, eŋbegı sıŋdı ǧoi, ne bolypty sonşa" degen sarynda sözderdı jaudyryp jatyr eken. Tūrsynbektıŋ qazırgı jaǧdaiyn keşıru - būl jemqorlyqqa barmaq basty, köz qysty qarau. Tūrsynbektıŋ öz balasyn Amerikaǧa aqyly oqytuǧa da jaǧdaiy jeter edı. Bıreudıŋ balasynyŋ grantyn, nesıbesın tartyp alu Tūrsynbekke laiyqty ıs pe? Sol jaiynda oilanyp kördıŋızder me? Onyŋ qarjysyn sanap otyrǧan jaiym joq. Ol qaltasy qarjyǧa tola otyryp, bıreudıŋ balasynyŋ grantyn tartyp alyp otyrǧanyn da eskerıŋız. Sol grantsyz qalǧan bala mümkın Qazaqstanǧa kerek abyroily önertapqyş nemese ǧalym bolatyn şyǧar erteŋ... Qaidan bıleiık... Bız jemqorlyqqa köz jūma qaraimyz ǧoi. Sondyqtan bolaşaqty bılmeimız...
Myqty memleket ornatyp, zaŋ men tärtıpke oryn berıp otyrǧan Oŋtüstık Koreia prezidentın de jemqorlyq äreketı üşın sottap jıberdı ǧoi. Qazır zaŋ men ǧylym, bılım bilık qūrǧan Oŋtüstık Koreia jaman bolyp otyr ma? Mıne, örkeniettı el bolamyz desek, elımızdıŋ bolaşaǧyna, äsırese, balaŋyzdyŋ bolaşaǧyna köz jūma qaraǧyŋyz kelmese, onda ädıldık jaǧyna şyǧyŋyz! Zaŋ men tärtıptı ornatuǧa özıŋız üles qosyŋyz! Sonda sızdıŋ de balaŋyz örkeniettı elde ömır süretın bolady.
Al, mynau Tūrsynbektıŋ jaiyna keletın bolsaq, būl Tūrsynbek qazaǧynan eşqandai da jamanşylyq körgen joq. Qazaǧynyŋ arqasynda ösıp-öndı. Kezınde mazaqtady da özı ösıp-öngen elın. Qazırgı tırlıgı aqtap aluǧa jatpaidy. Zaŋ aiasynda jauap bersın! Özınıŋ jauapkerşılıgın moinymen kötersın! Qylmysy üşın zaŋ aldynda jauapqa tartu zūlymdyq emes, ädıldık! Sonymen qatar, Tūrsynbektıŋ qyzyna jalǧan qūjat jasaǧan HQKO-ǧa da tekserıs jasalyp, bärı jauapqa tartylsyn! Äitpese, būl zaŋsyzdyq toqtamaidy. Būl bızdıŋ jemqorlar qaptaǧan qoǧamǧa sabaq bolady. Äitpese, grantty tek qana Tūrsynbektıŋ qyzy ǧana jemqorlyq jolmen alyp jatqan joq, ondailardyŋ sanyna jete almaisyŋ tekserıs bolsa.
Örkeniettı Qazaqstannyŋ kepılı - būl ärbırıŋızdıŋ zaŋ men ädıletke tura qarap, maskany şeşıp tastap, beldı bailap tastap äreketke kırısulerıŋızge bailanysty.
Bekbolat QARJAN,
"Adyrna" ūlttyq portaly
Ūqsas jaŋalyqtar
