Shámshi Qaldaıaqov 1930 jyly 15 tamyzda qazirgi Túrkistan oblysy Otyrar aýdany Sháýildir aýylynda dúnıege kelgen. Kishi júzdiń Jaǵalbaıly rýynan shyqqan.
Ákesi Qaldaıaqtyń shyn aty Ánápııa bolǵan, al anasy tóreniń qyzy – Saqypjamal. Ákesi dúnıege ul kelse, oǵan Jámshıd patshanyń atyn qoıamyn degen eken. Bir kúnderi túsinde ulynyń aıdyn kólden aqqý qus bolyp júzip júrgenin kórip, jaqsyǵa jorypty.
Shámshiniń ákesi Qaldaıaq aýyl sharýashylyǵyna qajet qural-saımandardy jasaıtyn sheber, jańqaǵa jan bitirer usta bolǵan, qobyz ben dombyrada erkin oınaǵan, qıssalardy jatqa aıtqan. Kompozıtordyń ákesi men anasy án ónerinen quralaqan bolmaǵan, olar da týǵan jerinde toı-dýmannyń kórki bolǵan desedi.
Shámshi Qaldaıaqov mektepti bitirgen soń Saryaǵashtaǵy mal dárigerlik tehnıkýmynda bilim aldy. Oqýyn bitirgen soń 20 jastaǵy Shámshi Aqtóbede segiz aı eńbek etedi. 1951-1954 jyldary Qıyr Shyǵysta áskerı boryshyn atqarǵan.
Áskerden kelgen soń Shámshi Máskeýdegi Chaıkovskıı atyndaǵy ýchılıege oqýǵa túsedi. 1954 jyly ony bitirmesten, elge qaıtyp keledi. Anasy naýqastanyp jatyp, balasyn orys bolyp ketedi dep qorqyp, shaqyrtyp alǵan eken. Aýylǵa oralǵan soń úıirmelerge qatysyp, klýb meńgerýshisi bolyp qyzmetke aralasa bastady.
1955 jyly Tashkenttegi Hamza Nııazı atyndaǵy mýzykalyq ýchılıege mýzyka teorııasy fakýltetine qabyldanady. Ol jerde issaparmen Tashkentke barǵan ánshi Jamal Omarovamen tanysady. Sóıtip Shámshini Almatyǵa shaqyrady.Tashkenttegi oqýyn bitirmeı, Shámshi Almatyǵa kóship keledi. 1956 jyly Qaldaıaqov Qurmanǵazy atyndaǵy konservatorııaǵa oqýǵa túsedi. Ol jerde alty jyl boıy birinshi kýrs stýdenti bolyp júredi.
Shámshi Qaldaıaqov artynan 300-ge jýyq án jazyp qaldyrdy. Syrǵa toly, muńǵa toly názik, yrǵaqty ánderi qazaq dalasyn alaqanyna salyp aıalap, áli de terbetip keledi. Al onyń "Meniń Qazaqstanym" atty týyndysy búginde qazaq eliniń memlekettik Ánuranyna aınaldy.
Shámshi Qaldaıaqov ómiriniń sońynda Jambyl oblysyndaǵy Dúngen aýylynda turǵan. 1991 jyldyń 16 qarashasynda derti asqynyp, aýrýhanaǵa túsken. Sol jyldyń 29 jeltoqsanynda kompozıtorǵa "Qazaqstannyń Halyq ártisi" ataǵy berilgen. Halqyn súıgen, halqy súıgen sazger 1992 jyldyń 29 aqpanynda kóz jumdy.
Ótken jyly Túrkistan oblysy Otyrar aýdanynda Shámshi Qaldaıaqovtyń 90 jyldyq mereıtoıy qarsańynda kompozıtorǵa arnalǵan Qazaqstandaǵy alǵashqy mýzeı ashyldy.
"Adyrna" ulttyq portaly.
