Túrkimenstanda 18 áskerı qyzmetker belgisiz jaǵdaıda qaza tapty, dep habarlaıdy «Adyrna» tilshisi Azattyqtyń Túrkimen qyzmetine silteme jasap.
Jıyrmaǵa jýyq sarbazdyń týystaryna olar Ashhabad mańyndaǵy kólik apatynan qaza tapty dep aıtylǵan. Alaıda Azatlyk derekkózderi bul nusqanyń durystyǵyna kúmán keltiredi. Olardyń aıtýynsha, oqıǵaǵa Aýǵanstandaǵy jaǵdaıdyń qatysy bolýy múmkin.
18 shilde kúni 6 áskerı qyzmetkerdiń denesi týystaryna «KamAZ» kóligimen jetkizildi. Máıitter jabyq tabytqa salynǵan. Áskerı qyzmetkerlerdiń deneleri Lebapqa Ashǵabattan emes, Aýǵanstanmen kórshiles Marydan jiberilgen.
Eldiń Qorǵanys mınıstrligine jaqyn derekkózderdiń biri qarýly kúshter shyǵynynyń 18 adamdy quraǵanyn málimdedi. Olardyń ishinde maıor men aǵa leıtenant bolǵan. Ekeýi de Lebap aımaǵynan shyqqan. Qaıtys bolǵandardyń kópshiligi Marı jáne Dashogýz oblystarynan kelgen.
«Adyrna» ulttyq portaly
