Koronavırýs pandemııasy 2020 jyly balalarǵa qyzylsha, kókjótel jáne basqa da ınfekııalyq aýrýlarǵa qarsy ekpe salý josparyn buzyp jiberdi, dep habarlaıdy «Adyrna» ulttyq portaly Sputnik Qazaqstan saıtyna silteme jasap.
DDU men IýNISEF usynǵan jańartylǵan málimetterge sáıkes, 2020 jyly pandemııa saldarynan josparly ımmýndaý aıasynda 23 mıllıon bala negizgi ekpeni almaǵan. Bul 2019 jylǵy kórsetkishten 3,7 mıllıonǵa kóp. Sonymen qatar shamamen 17 mıllıon bala bir jyl ishinde birde-bir ekpe almaǵany da alańdatyp otyr.
«Memleketter COVID-19-ǵa qarsy vakınany alýǵa tyrysyp jatqan shaqta biz basqa ekpe túrleri boıynsha keıin qalyp, qyzylsha, kókjótel, polıomıelıt nemese menıngıt syndy aýrýlar balalarǵa qaýip tóndirip otyr. Bul aýrýlardyń kóptep taralýy búginde koronavırýspen barynsha kúresip jatqan qaýymdastyq pen densaýlyq saqtaý júıesi úshin apatty sıpatta bolady. Sondyqtan balalardyń árqaısysy ekpe alýyn jiti qadaǵalaý kerek», - dedi DDU bas dırektory Tedros Adhanom Gebreıesýs.
Immýndaý qyzmetiniń jumysyndaǵy 2020 jylǵy bul aqaý kóbine Ońtústik-Shyǵys Azııa men Shyǵys Jerorta aımaǵyna zııan keltirip otyr. Tıisti vakınalaýdy almaǵan balalardyń kóbi qaqtyǵystar soǵys áreketteri júrip jatqan, qyzmet kórsetý deńgeıi tómen nemese kólik qatynasy qıyn óńirlerde turady.
Ekpe salǵyzbaý búginde Pákistanda qyzylsha juqtyrǵandar sanynyń artýyna alyp keldi.
DDU Úndistan, Pákistan, Indonezııa, Fılıppın, Meksıka, Angola, Tanzanııa, Mozambık, Argentına, Venesýela jáne Malıdegi balalarǵa dıfterııaǵa, sirespege jáne kókjótelge qarsy vakınanyń jetkiliksiz deńgeıde salynýyna qatysty alańdap otyr.
Sonymen qatar osy atalǵan aýrýlarǵa qarsy vakınalaý deńgeıi 86% deıin tómendedi. Al halyqty tolyqtaı qorǵaý úshin bul kórsetkish 95% deńgeıinde bolýy kerek.
"Adyrna" ulttyq portaly
