كوروناۆيرۋس پاندەمياسى 2020 جىلى بالالارعا قىزىلشا، كوكجوتەل جانە باسقا دا ينفەكتسيالىق اۋرۋلارعا قارسى ەكپە سالۋ جوسپارىن بۇزىپ جىبەردى، دەپ حابارلايدى «ادىرنا» ۇلتتىق پورتالى Sputnik قازاقستان سايتىنا سىلتەمە جاساپ.
ددۇ مەن يۋنيسەف ۇسىنعان جاڭارتىلعان مالىمەتتەرگە سايكەس، 2020 جىلى پاندەميا سالدارىنان جوسپارلى يممۋنداۋ اياسىندا 23 ميلليون بالا نەگىزگى ەكپەنى الماعان. بۇل 2019 جىلعى كورسەتكىشتەن 3,7 ميلليونعا كوپ. سونىمەن قاتار شامامەن 17 ميلليون بالا ءبىر جىل ىشىندە بىردە-ءبىر ەكپە الماعانى دا الاڭداتىپ وتىر.
«مەملەكەتتەر COVID-19-عا قارسى ۆاكتسينانى الۋعا تىرىسىپ جاتقان شاقتا ءبىز باسقا ەكپە تۇرلەرى بويىنشا كەيىن قالىپ، قىزىلشا، كوكجوتەل، پوليوميەليت نەمەسە مەنينگيت سىندى اۋرۋلار بالالارعا قاۋىپ ءتوندىرىپ وتىر. بۇل اۋرۋلاردىڭ كوپتەپ تارالۋى بۇگىندە كوروناۆيرۋسپەن بارىنشا كۇرەسىپ جاتقان قاۋىمداستىق پەن دەنساۋلىق ساقتاۋ جۇيەسى ءۇشىن اپاتتى سيپاتتا بولادى. سوندىقتان بالالاردىڭ ارقايسىسى ەكپە الۋىن ءجىتى قاداعالاۋ كەرەك»، - دەدى ددۇ باس ديرەكتورى تەدروس ادحانوم گەبرەيەسۋس.
يممۋنداۋ قىزمەتىنىڭ جۇمىسىنداعى 2020 جىلعى بۇل اقاۋ كوبىنە وڭتۇستىك-شىعىس ازيا مەن شىعىس جەرورتا ايماعىنا زيان كەلتىرىپ وتىر. ءتيىستى ۆاكتسينالاۋدى الماعان بالالاردىڭ كوبى قاقتىعىستار سوعىس ارەكەتتەرى ءجۇرىپ جاتقان، قىزمەت كورسەتۋ دەڭگەيى تومەن نەمەسە كولىك قاتىناسى قيىن وڭىرلەردە تۇرادى.
ەكپە سالعىزباۋ بۇگىندە پاكىستاندا قىزىلشا جۇقتىرعاندار سانىنىڭ ارتۋىنا الىپ كەلدى.
ددۇ ءۇندىستان، پاكىستان، يندونەزيا، فيليپپين، مەكسيكا، انگولا، تانزانيا، موزامبيك، ارگەنتينا، ۆەنەسۋەلا جانە ماليدەگى بالالارعا ديفتەرياعا، سىرەسپەگە جانە كوكجوتەلگە قارسى ۆاكتسينانىڭ جەتكىلىكسىز دەڭگەيدە سالىنۋىنا قاتىستى الاڭداپ وتىر.
سونىمەن قاتار وسى اتالعان اۋرۋلارعا قارسى ۆاكتسينالاۋ دەڭگەيى 86% دەيىن تومەندەدى. ال حالىقتى تولىقتاي قورعاۋ ءۇشىن بۇل كورسەتكىش 95% دەڭگەيىندە بولۋى كەرەك.
"ادىرنا" ۇلتتىق پورتالى
