Shymkentte Ulttyq dombyra kúni atalyp ótti. Karantındik sharalardyń kúsheıýine baılanysty buqaralyq-mádenı is-sharalardyń kópshiligi onlaın formatta ótti. Dese de, eki erekshe oqıǵa megapolıs turǵyndary men qonaqtarynyń nazaryn aýdardy.
Shahardaǵy "Túrkistan" saraıy men J.Shanın atyndaǵy akademııalyq qazaq drama teatrynyń ǵımarattaryna pop-art stılindegi uly kúıshilerdiń úlken portretteri ilindi. Osylaısha, bılik ańyzǵa aınalǵan Qurmanǵazy, Dına, Táttimbet, Dáýletkereı, Kenen Ázirbaev, Birjan sal, Qazanǵap, Jaıaý Musa syndy qazaqtyń dombyrada oınaý sheberleriniń rólin kreatıvti túrde kórsetti. Olardyń sýretteri qaladaǵy bılbordtarǵa da ilinip, keńinen nasıhattaldy.
Al ShymQala etnoaýylynda dombyra jasaý boıynsha onlaın-master-klass ótti. Qolónershiler ulttyq aspaptyń qandaı materıaldardan jáne qalaı jasalatynyn, onyń biregeıligi men múmkindikteri týraly aıtyp berdi.
Bul kúni qala kitaphanalarynda kitap kórmeleri men ádebı keshter uıymdastyryldy. Al Arbatta kospleer-ártister kostıýmder men atrıbýttardyń kómegimen tanymal kúıshilerdiń beınesin somdady.
Dombyra júzdegen jyldar boıy qazaqtardyń qýanyshy men qaıǵysynyń da kýágeri boldy. Bıyl Qazaqstanda dombyra kúni tórtinshi ret atap ótilýde. Bul ulttyq qundylyqtardy dáripteýge baǵyttalǵan óte mańyzdy mereke. Ásirese jastar úshin óte mańyzdy.
Esterińizge sala keteıik, 2018 jyly Qazaqstan Respýblıkasynyń Tuńǵysh Prezıdenti – Elbasy Nursultan Nazarbaev shildeniń birinshi jeksenbisin Ulttyq dombyra kúni dep belgileý týraly qaýly shyǵarǵan bolatyn. 2014 jyly IýNESKO dástúrli dombyra kúıin oryndaý ónerin adamzattyń materıaldyq emes mádenı murasy dep tanydy. Dombyra kúıi adamzattyń materıaldyq emes mádenı murasynyń Reprezentatıvtik tizimine engizilgen alǵashqy Qazaqstandyq mura boldy.
